Mizoram sorkarin Mizorama Territorial Army din tura hmala tura a ruat Lt Col Clement Lalhmingthanga, MLA chuan nimin khan thu thar thehdarhtute a kawm a; Mizo Territorial Army (TA) Battalion-te (Home & Hearth) awmna tur hmun thlan fel la ni lo mah se, July thla atangin Mizoram district hrang hrangah a tang tur lak tan tum a nih thu a sawi.
Aizawl Press Club-a thu thar thehdarhtute a kawmnaah Lt Col Clement Lalhmingthanga chuan, chief minister Lalduhoma thahnemngaihna avangin sorkar laipuiin Mizorama TA din phalsak tawh mah se, an awmna tur hmun hi thlithlai mek zel niin, thlan fel a la nih loh thu a sawi.
Lt Col Clement Lalhmingthanga chuan ruahman dan chuan TA-a tang tur lakna hi June atanga tan tur ni mah se, ruahsur nasa leh harsatna dangte avangin July thlaah sawn a nih thu a sawi. Tunah rih chuan lak tan ni tur tak hi an sawi chian fak theih a nih loh thu a sawi a. Ruahman dan chuan July thla chawhnu atangin district hrang hrangah lak rûnpui neih an tum tih a sawi.
TA atana lakte hian test hrang hrang an paltlang hnuah, an ruahman dan chuan November thla khian Shillong-a Assam Regiment Training Centre-ah thla ruk vel training neihpui hman tum a nih thu a sawi bawk.
Tun tumah hian TA-ah mipa, kum 18-24 inkarte chauh lak an ni dawn a. Ram pum huapin Mizorama TA-a tang tura dil theih ni mah se, Mizorama piang leh sei lian an ni ngei tih finfiahna lehkha pawimawh an neih a ngai dawn a. Mahse, a bul tan nan hian sipai pangngai anmahni kaihruaitu tur an awm a ngaih avangin, Mizo hlang an ni rih dawn lo niin a sawi.
Lt Col Clement Lalhmingthanga chuan Mizorama TA hi company hnih din tura ruahman ni mah se, tun tumah hian company pakhat lak phawt a ni dawn tih sawiin, “Company pakhat-ah officer pakhat, Junior Commissioned Officer (JCO) pali bakah other range 82, an vaiin mi 102 an awm dawn a. Assam Regiment-in an enkawl dawn a, zawi zawia thang chhovin, batallion-ah an rawn thang chho dawn a ni,” a ti.