Aizawl: Aizawl Smart City Limited, Urban Development & Poverty Alleviation Department hmalaknain nimin khan UD&PA Minister K Sapdanga’n Civil Hospital, Aizawl-ah MRI khawl leh medical bungraw dangte a hlan.
Civil Hospital, Aizawl Conference Hall-a khawl hlanna hun hmanah UD&PA Minister K Sapdanga chuan Mizo mipui, a bikin mirethei leh harsa zawkte tan phei chuan tihdamna hmunpui ang hiala ngaih, Civil Hospital, Aizawl-in MRI khawl a nei tur chu thlamuanthlak a tih thu a sawi a. Mizo doctor thiam tak takte pawhin hmanrua an neih that tawk loh avanga an thiamna leh theihna te a nih tur anga an hman chhuah theih loh fo thinnate pawhin ziaawm lam a pan chhoh zel a beisei thu a sawi.
He huna khual zahawm Health Minister Lalrinpuii pawhin thu sawiin, Aizawl Smart City hmalakna fakawm a tih thu leh department hrang hrangte inkara thawhhona tha a awm chu lawmawm a tih thu a sawi a. Public hospital-te hi miharsa zawkte tan a pawimawh tih sawiin, thawm tha tura Mizoram sorkarin hma a lak mek thu a sawi.
MRI khawl hi German Company, Siemens Healthineers kutchhuak niin, Rs nuai 872 man a ni a; Siemens Company nen hian a chhiat pawha enkawl zui zelna turin thawhdunna thuthlung kum 10 chhung atan an ziak a ni a. Smart City hmalakna hian MRI khawl bakah hian khawl dang chi hrang hrang 24 chu Civil Hospital Aizawl tan lei a ni.
Aizawl Smart City hmalakna hian tun hnaiah sorkar leh private hospital hrang hrangte tan Ambulance pariat lei a lo ni tawh bawk a; Tuirialah Common Bio-medical Waste Treatment plant Rs nuai 801.15 sengin din a lo ni tawh bawkin, April 2025 atang khan hman tan a ni tawh a ni.