Black Eyed Peas member Will.i.am (50) chuan hmun thim tak atangin music-in a chhanchhuak nia sawiin, hun khirh tak a paltlang vanga a nun chau, mangang phili buai taka a awm laia chhanchhuaktu chu music a nih thu uar takin a sawi.
Kum engemaw chen kalta khan depression leh anxiety vangin a talbuai nasa thin hle a, mangang leh chi-ai taka a awm thin chu music hian a thawidamsak a, hun khirh namen lo atangin a pawtchhuak nia sawi bawkin, “Ka tan chuan, ka inhumhimna phaw lian tak a ni ringawt mai a, ka damna damdawi pawh a ni.
“Ka tan a khirh em em a, hmun thim takah rei tak ka khawsa hman. Ka chi-ai leh chiam thin bawk a, ka harsatna leh manganna sawichhuah pawh hi ka duh ngai lo. A chhan chu, ka chi-ai leh vak ka hlauh vang a ni. Ka tan talchhuah kha a harsa em mai a…,” a ti.
Hman deuh khan Black Eyed Peas hla thar, ‘Be Nice’ tih chu Will hian a siam a, he hla-in a tum ber chu rilru lama buaina leh harsatna nei te zinkawng hautak leh khirhkhanzia tarlanna niin, an harsatna hriattpui a, tanpui tura sawmna a tel .
He hla vek hian talchhuahna kawng duhawm a hawnsak niin, a testimony-ah a sawi bawk.
A hla thu thenkhat sawichhuakin, “I just want to be happy, I don’t want to throw nasty. I’m just trying to change my vibration around so I can feel fantastic. I’m looking at myself in the mirror, I’m telling myself to cheer up.’ tih te a awm.
A thim zâwnga khawsak ai chuan a eng zâwnga inhmuh te pawh a pawimawh fo tih ka zirchhuak, tiin a sawi. Midang tana malsawmna ni turin khaw-vel mipuite a ngen nghal.