Aizawl: June 6, 2025 atanga Sairang leh Hortoki inkara rel tlan chhintirna hnuhnung ber, final trial chu nimin khan hlawhtling taka neih a ni.
India zalen hnua a vawi khat nan Northeast Frontier Railway (NFR) ruahmannain rel tlan enchhinna hnuhnung ber chu neih a ni a, darkar khata km 110-a chakin Sairang leh Hortoki inkarah tlantir niin enfiah nawn leh a ni.
Commissioner of Railway Safety (CRS) NF Circle, Sumeet Singhal hovin June 6, 2025 atang khan rel kawng a him leh him loh a endik a ni. Rel hian km 33.864 chuang kawng a zawh a ni.
May 1, 2025 khan NFR General Manager (Construction) hovin Bairabi leh Sairang inkar enchhin a lo ni tawh a. |um thum enchhin a nih hnuah nimin khan enchhin tawpna ber neih a ni a. He kawng hi nimin thleng khan zaa 94.25 hnathawh zawh tawh a ni.
NFR hotute chuan rel kawng endik hna zawh fel hunah, a him tawk a ni tih finfiahna tul dangte a buaipui zawh hun, June 17, 2025 hnu lamah rel kawng hi hawn theih an beisei thu an sawi.
Sairang thlenga rel luh tir hi sorkar laipui policy, Act East Policy tihhlawhtlinna pakhat niin, inkalpawhna tha leh tlawm bakah, sum leh pai dinhmun tihhmasawnnana hmarchhak state-te thlunzawm chu a tum ber a ni.
Bairabi atanga Sairang thleng rel kawng hi km 51.38-a thui niin, he rel kawngah hian station pali – Hortoki, Kawnpui, Mualkhang leh Sairang-Sihhmui station awm tura ruahman a ni. Rel kawngah hian leiverh 48, lei (bridge) lian 55, lei te 87 a awm dawn a ni.
He rel kawng hi hawn a nih hunah chuan, Mizoram chu hmarchhak state zinga National railway Network-in khawpui a thlunzawm zinga palina a ni dawn tihna a ni.