Aizawl: Directorate of SCERT, Mizoram buatsaihin ni li awh tur, Workshop to Contextualise & Revise Elementary School Textbook for the Academic Session of 2026 – 2027 chu nimin khan neih tan a ni.
Workshop hi SCERT, Auditorium, Chaltlangah SCERT Director Carilone Zoramthangi’n a hawng a. Textbook thar buatsaih tura kaihruaitu tur chu Curricular goals, Competencies leh learning outcomes a la ni reng dawn tih sawiin, NCERT textbooks an hman avangin a paih leh belh ngai an tihte en chung zelin, state leh culture mil texbook tha tak an siam chhuah ngei a beisei tih a sawi.
SCERT Director chuan SCERT Mizoram chuan NCERT textbook tharte hi Mizoram mila siam rem phalna fel fai tak a neih thu a sawi a. Tun tumah hian pawl 1, pawl 2, pawl 3 leh pawl 6 zirlaibute chu siam rem a, kum 2026-2027 atanga hman tan tur a ni a. Mizo leh Hindi subject bik erawh chu textbook hmanlai te ennawnin, NEP 2020 leh NCF-SE 2023 zulzuia dah belh ngai leh siam rem ngaite siam rem tura buatsaih a nih thu a sawi bawk.
Workshop hi SCERT Joint Director Zoramthangi Ralte-in a kaihruai a, Dr. Lalduhawmi Thomte, Joint Director SCERT pawhin thu a sawi a. He workshop-ah hian sikul subject hrang hrang – English, Hindi, Mizo, Social Science, Environmental Studies, Mathematics leh Science Textbook Committee-te an kal a. Subject Committee hrang hrang atan hian sikul, college, university leh education department-a thawkte ruat an ni.