David Beckham chu knight nihna pek a ni dawn a, Sir David Beckham tih a nih tawh dawn bakah, a nupui Victoria pawh Lady Beckham a ni tawh ang.
Knight nihna hi mi nazawng hnenah an pe ngai lo a, mi vantlang chung lama ngaih, thil hlen chhuah ropui tak nei chin chauh an pe thin.
Manchester United player hlui hian England tan vawi 115 a khel a, football huanga British mi zingah knight ni thei 17-na a ni thei dawn chiah a ni.
British mi, football huanga inhnamhnawih zingah Sir Charles Clegg chu knight ni thei hmasa ber niin, England player thin, a hnua FA president ni leh ta hi kum 1927-ah knight nihna pek a ni.
Sir Stanley Rous chu a pahnihna niin, referee ni thin, FIFA president parukna ni ta bawk hi kum 1949-ah knight a ni a. England legend Sir Stanley Matthews chu kum 1965-ah knight an nihtir a, European Footballer of the Year chawimawina dawng hmasa ber a nih kum niin inkhelh a chawlhsan hmaa hetiang nihna pek hmasak ber a ni.
World Cup final-a West Germany laka England chakpuitu, manager Sir Alf Ramsey chu kum 1967-ah khan knight nihna an pe a. Kum 1968-ah Manchester United icon Sir Matt Busby chu an pe ve leh a, ani hi manager zingah English team-te European Cup lakpui thei hmasa ber a ni.
Kum 1978-ah Sir Walter Winterbottom chu an pe ve leh a, kum 1991-ah FA chairman thin, Sir Bert Millichip chu knight an nihtir ve leh bawk a. Kum 1994-ah World Cup champion ni thei, khatih laia England tana goal khung hnem ber ni bawk, CBE leh OBE chawimawina pawh lo dawng tawh, Sir Bobby Charlton chu an pe ve leh a ni.
Kum 1998-ah Sir Geoff Hurst leh Sir Tom Finney te chu knight an nihtir ve leh a, kum 1999-ah nomawi pathum Manchester United lakpuitu, Sir Alex Ferguson chu knight-ah an hlang kai.
Kum 2002-ah Newcastle United legend Sir Bobby Robson chu knight an nihtir ve leh a, kum 2004-ah England leh West Ham United icon Sir Trevor Booking an hlang kai ve leh a, kum 2006-ah Sir Dave Richards chu knight an pe leh bawk.