Aizawl: Central Bureau of Investigation (CBI) chuan kumtlinglo khuaikhemtu leh Child Sexual Abuse Material (CSAM) nei leh thehdarha puh, Aizawl mi pakhat chu thubuai siamsakin, June 9, 2025 khan an man.
CBI tar lan danin, May 30, 2025 khan an mi puh lakah kum tling lote chunga mipat hmeichhiatna hmansualna langsar tak tak tar lanna CSAM siam, khawnkhawm, dahkhawm leh upload-ah puhin thubuai an siamsak a. Thubuai siamsaktu hian dan kalhin kumtlinglo khuaikhem lai video kawlah an puh bawk.
CBI hian June 4, 2025 khan an mi puh chenna in hi dapin, electronic device an man sak a. Forensic endikna atangin thlalak leh video mawi lo tak tak awmna, CSAM tam tham tak an hmu chhuak bawk.
An thil mante hi INTERPOL International Child Sexual Exploitation (ICES) database atanga data leh, Google-a Cyber Tipline Reports (CTRs) te nen nemngheh a ni. Indian Cyber Crime Coordination Centre (I4C), Ministry of Home Affairs hnenah pawh hriattir a ni.
Forensic zirchianna atangin an mi puh hian naupang hi Aizawlah a khuaikhem ngei tih tarlan a ni. CBI chuan chak taka hma la nghalin, an mi puh nihna leh awmna hi hrechhuak thuaiin, naupang pawh hi an chhanchhuak thei a ni. An chhui chianna atangin an mi puh hian CSAM siamna atan hian naupang hi a vau tih hriatchhuah a ni bawk.
CBI inrawlh hma hian he naupang leh a chhungte hian thuneitute lamah engmah an thlen lo a, CBI hian hma lain thubuai pawh hi anmahniin an ziak lut a ni.
CBI chuan an mi man hi identity engmah a tar lang lo va. He thubuai hi an chhui zui mek zel thu CBI chuan an tar lang.