Aizawl: MNF Policy & Programme Board Meeting Vawi 3-na nimina neihah thalaite hna thawh tur siamsak leh hnathawk thei tura thiamna neia thalaite chher chhuah dan tur sawi ho zingah a langsar ber a ni.
Thiamna bik leh tawn hriat chi hrang hrang neite telna MNF Policy & Programme Board Meeting hi Mizo Hnam Run, President’s Chamber-ah neih a ni a, Board chairman MNF Sr. Vice President Dr. R. Lalthangliana chuan sorkarna siam leh tura inbuatsaihna ngawrh taka an kalpui chhoh mekah Zoram mipuite tana innghahna tlak Policy leh Programme, a taka kalpui theih tur duan chhuah a tul tih sawiin, member te chu uluk taka ngaihtuahna seng turin a chah.
Sawihonaah hian mipui nawlpuite an damloh nikhuaa an inenkawlna, Mizoram Universal Health Case Scheme (MUHCS) mumal zawka duan dan tur huam zau takin an sawiho a. Tuna ZPM sorkarin MUHCS a kalpui mekah ruahmanna fel lo tam tak a awm avanga miretheite tawrhna thleng mek chungchang te, sorkarin Private Hospital-te inbiak remna a neihpui hmasak loh avanga damlo ten an tawrh mek dan leh sorkar damdawi in-a khum chang si lo, Private Hospital ban phak bawk si lo, manganna tawk mek damlo tam tak an awm thu thutkhawmah hian sawi lan a ni.
Thutkhawmah hian thil dang bakah Mizo thalaite tana hna thawh tur tam zawk siam belh leh, hna thawk thei tura thiamna neia thalaite chher chhuah chungchang chu an sawiho zingah a langsar hle a. Hemi kawngah hian policy tha leh rintlak duang ngei turin fimkhur tak leh uluk taka zirchianna kalpui nise an ti.
Thutkhawmah hian MP, MLA, Ex-MLA, dan hre mite leh kawng hrang hranga thiamna bik leh tawnhriat nei zau tak takte an tel a ni.