An hmelma kumhlun, India nen chawlhkar tam la liam lova a vawi nga nana an indo hnuah Pakistan chuan ram venhimna lama sum a hman tur chu budget a pharh takah nasa takin a tipung.
Thawhlehnia 2025-2026 chhunga sum hman tur a pharhah hian venhimna atana sum dan hran chu Rs. nuai 25,500 a ni dawn a, thla hmasaa tawp ta tangka kuma an dah aiin 20%-in a tam zawk.
Ram venhimna lam thila hman tur sum an tihpun avang hian thil danga an hman tura an dah thin tam tak chu 7% velin a hniam phah thung.
Budget pharh thar atang hian Prime Minister Shehbaz Sharif-a’n kum 30 dawn chhunga nuclear nei ram pahnih indona nasa ber a thlen hnuah Pakistan-a sipaite tihchak leh tihchangtlun chu a ngai pawimawh hle niin a lang.
May thla khan inthenawm ram hnihte hi indo thlawhna, missile, drone leh laipui hmangin ni li chhung vel nasa takin an inbei a ni.
He indona hi April 22-a Indian awp chin Kashmir-a Pahalgam hmuna mi sualten mi an 26 an thah thu kal zelin a hrin chhuah a ni a. A thattute hi India chuan Pakistan-in a thlawp helho niin a sawi a, Pakistan-in inrawlhna engmah an nei lo tih a sawi thung.
Sum leh pai mi thiamte chuan ram venhimna thila sum hman tur Pakistan-in 20%-a a tipung hi an lo rinlawk sa a ni a, hmasawnna hna thawhna atana sum dah chu la hekin hemi lam hi nasa zawka an hawi an lo ring sa tih Reuters news agency chuan a tar lang.
India hian 2025-2026 chhungin ram venhimna thilah $ tluklehdingawn 78.7 hman turin a ruahman a, a hma kum aiin 10% dawnin a tam zawk a. Mi thiamte chuan hei pawh hi nakin zelah tihpun hret hret a nih tur a lang tan niin an ngai.