Aizawl: Sakura/Japan Science High School Program-a tel tur Mizo zirlai pali, state aiawh a tel turte chu School Education Director Angela Zothanpuii’n nimin khan a vai liam.
Japan Science & Technology (JST) Agency leh Ministry of Education-te bul tumin he programme hi kal pui a ni a, heta tel tur hian sorkar laipuia Ministry of Education chuan February thla atang khan thlanna hi a lo kalpui tan tawh a ni.
Mizo naupang thlanchhuante chu K. Darthangmawia (Govt. Mizo HSS), FC Lalruathlui (Govt. Mizo HSS), Zorinzuali Bawlchhim (MICE) leh Gideon Malsawmtluanga (Govt. Zemabawk HSS) te an ni.
Naupang thlanchuahte hian state dang atanga thlan chhuah naupangte nen, NCERT Delhi-ah June 14, 2025 hian Orientation Programme an hmang ang a, a tukah Tokyo an pan dawn a ni.
Japan an cham chhung hian Science & Technology lama Japan hmun pawimawh hrang hrang University of Tokyo, Japanese Aerospace Exploration Agency (JAXA) hmun te, National Institute for Materials Science (NIMS), MIRAIKAN te leh hmun hrang hrang an tlawh dawn a ni.
Heng naupangte international flight, thlen leh ei in zawng zawng senso hi sorkar laipuia Ministry of Education leh JST hian a tumsak vek dawn a ni.