Aizawl: Parva Joint Action Committee thukhawm chuan Govt High School, Parva zirtirtu sawn a nih avanga lungawi lohna lantirin, zirna in zawng zawng tiamchin awm lovin an khar bakah, sorkarin transfer order a sut hma chuan zirtirtuin an khua a chhuahsan lohna turin dan an tum.
Ningani khan Parva JAC chuan kum tam tak hnua regular teacher an neih ve chhun, V. Lalhmangaihzuala sawn a ni chu khawtlang hruaituten an pawm loh thu leh, a transfer order sut leh a nih hma chu an khua a chhuahsan lohna turin dan an tum thu sawiin, lungawi lohna lan tirnan zirna in zawng zawng pawh tiamchin awm lovin an khar a ni.
Parva JAC chuan Parva Government High School hi an khua leh a chhehvel tan zirna in sang an neih chhun a nih avangin hlutin an tan pawimawh mah se, sorkar school ni chungin ngaihsak an hlawh ngai lo va, kumtin zirtirtu kim lovin session tawp thlengin an kal thin tih avangin zirlaiin harsatna an tawk nasa thin hle tih a sawi.
Zirtirtu indaih loh chungchang hi NGO leh pawl hrang hrang ten sorkar hnenah vawi tam tak an thlen thin a. Middle School atangin Chakma pahnih attached-in an dah a, high schoo-ah regular teacher pangngai dah tur leh, Mathematics leh Science teacher dah tura thuneitute hnenah ngen thin mah se, hmalakna a awm ngai lo niin Parva JAC chuan an sawi a. Tunah hian regular teacher pakhat an neih chu hmun danga transfer sak an nih avangin, regular teacher an nei tawh lo va, zirtirtu awm chhun chu Middle School atanga attached-a an dah Chakma pahnih chauh an ni tawh tih an sawi bawk.
Headmaster pawh Chawngte awm niin, sikul a kal ngai loh thu leh District Education Office (DEO) lamah a chungchang thlen thin mah se, hmalakna a awm ngai loh avangin khawtlang hruaitute pawhin tihngaihna kan hre tawh lo a. Zirtirtu pathum chauhin school hi an enkawl ve hram hram thin avangin a rang thei ang bera zirtirtu V Lalhmangaihzuala transfers order zut turin an phut tih an sawi.