Thingphun hun kan lo thleng leh ta. Kumin chu green mizoram day leh ruahsur a innang tha a. A lawmawm hle. Thingphun hi kan uar tawh mai bakah zirtirna a kal tha tawh a. Mipui pawh hian thingphun pawimawhna kan hre tawh a. Tunhma kan thingphun ang ngawt ni tawh lovin, tih tak taka ngaihtuah zui pawh kan uar chho turah ngai ang.
Hun kal tawhah thingphun hi a hun laiin kan ti hluai a. Mahse, mizo rilrua thil tih hluai a, hriat leh ngaihtuah zui loh a thamral ta mai mai a tam a. Awmze nei lova sum leh pai, tha leh zung kan sen tam tawhzia hi i hre reng ang u.
Thingphun mai hi chu a har lo. Sorkarin man lovin a sem a. A huho in picnic pahin kan phun a. Intihhlimna chikhat ang a hmang pawh kan tam thin. A chang chuan sorkar office chawl meuhin thingphun ni green mizoram day te kan huaihawt anih kha. Mahse kan thingphun chu a kum lehah te kan va en leh chauh a. A lo awm tawh lo emaw a ni a. Kan tha kan va sengthlawn nasa in kan ram hian a thatpuina a awm chuang ngai lo. Aizawl atanga Lengpui airport inkar kawngsir a kan phun tawh zozai pawh hi ngawdur pui siamna tham a ni tawh hial ang. Mahse, tuna a dinhmun chu heti zawng hi a la ni. Thing kan phun hian kan rilruah a lo puitlin a, ram tana a tangkaina tur ngaihtuah phak a tul. Kan boruak lum chho zel leh tuihna tlem tawlh tawlhte kan ngaihtuahnaah awm tel sela. Kan thingphun chu a enkawl zui pawh tuma kuta dah lovin keimahni ngei hi a venghim a, a puitlin thlenga mawhphurtu kan ni tih hre reng ila. Kan remchan apianga ka thingphun kha engtinnge a awm zel tih ngaihtuahna nei ila. Thlakhata vawikhat tal kan va tlawh a, a bawhtu hnim samfai zeuh hian amahin a dingchhuakin a lo thanglian mai tih hre bawk ila. Chu mawh chu mahni i inbel ang u.
A pawimawh ber mai chu kan thinlunga ram neitu, mawhphurtu nihna inbel a, a siamthatu tur chu keimahni ngei hi kan ni tih inhriatchianna hi a ni reng mai. He ram hi tuma kuta dah chi a ni lova. Kan tu leh fate tana lo siamthat a, lo buatsaih sauh sauh hi kan tih tur a ni. I tan, i tu leh fate tan sum i khawl a, i thawk pur pur a. Mahse, chenna tlak lovah a ram chu i siam si chuan engnge sawt ang? Rethei leh hausa pawhin kan thingphun enkawl hi kan tih theih vek a ni. Hawh u, PHUN a tâwp lovin ENKAWL zui hi i thupui tel ang u.