- George L. Ralte, Vaivakawn
Ni 15.6.2025 Pathianni khi Mizorama tlawmngai pawl lian ber a kan sawi Young Mizo Association (YMA) din champha a nih angin,YMA chanchin thenkhat hetiang hian i han thai lang lawk teh ang.
YLA/YMA DIN KUM
YLA/YMA hi ni 15.6.1935 khan din niin, YMA hruaitu hmasa ber te chu
President:Niara
Vice President: Zaii
Treasurer: Zorema pa B.A.
Secretaries: Pasena leh Vankhuma
Committee Member hi mi pasarih an awm a ni.
YLA TIH YMA TIH A THLAK KUM
YLA kha YMA tih a an thlak hun leh kum chu
Ni 7.10.1947 ah a ni.
YMA INKHAWMPUI LIAN (GENERAL CONFERENCE) NEIH HMASAK BER
YMA Inkhawmpui lian (General Conference) neih hmasak ber chu ni 23.10.1941 atanga ni 26.10.1941 inkar
KUM 1974 AH YMA FLAG NEI TAN
Kum 1974 YMA Inkhawmpui lian (General Conference) an neih ah khan YMA Flag neih rawtna hi lut chu sawiho niin, lungrual takin YMA Flag chu a sen, a var, leh a dum ni rawh se tiin an pass ta a ni.
YMA CHHANG DIN KUM
Kum 1975 a YMA Inkhawmpui lian (General Conference) nei chuan YMA chhang din an rem ti a, YMA Chhang din hmasa ber chu YMA Hualngohmun Branch te an ni.
YMA EMBLEM HMAN KUM
Kum 1978 khan YMA Emblem hi hman tan niin rin bial chhung ah YMA tih a chuang a, rin bial chhung ah YMA kutin meichher alh a chelh lei lem, leh meichher kuang thum nei a siam danglam a ni.
YMA CHIBAI BUK DAN HMASA BER
Kum 1977 a YMA Inkhawmpui lian (General Conference) nei chuan YMA chibai in buk dan rawtna YMA Branch pakhat atanga rawt lut chu rem tih niin YMA chibai in buk dan atan chuan kut ding lam sat hahin, koki zawn ah pir chhuakin, zawi vak lova lak thlak leh ni se tih a ni.
BRANCH YMA ZAIPAWL INTIHSIAK NEI TAN KUM
Ni 15.6.1971 YMA day pualin ram pum huap Branch YMA zaipawl intihsiak hi neih tan niin he Branch YMA zaipawl intihsiak neih hmasak ber a pakhatna chu YMA Kulikawn Branch an ni.
CYMA CHANCHINBU CHHUAH TAN KUM
Kum 1973 atang khan Central YMA chanchinbu hi chhuah tan niin Editor hmasa ber chu C.Vulluaia niin, kan Branch YMA atang pawh Central YMA chanchinbu Editor ah hian Prof.Malsawmliana a lo ni tawh bawk a ni.
YMA KUMPUAN NEIH TAN KUM
KUM 1983 atang khan YMA hian kumpuan kum khat chhung atan kumpuan nei tanin, YMA kumpuan thupui neih hmasak ber chu FAINA tih a ni.
CENTRAL YMA FOOTBALL TOURNAMENT NEIH TAN KUM
Kum 1985 kha YMA kum 50 tling lawm kum a nih avangin hemi pual hian YMA kum 50 tling Football Tournament buatsaih niin, Final ah Vaivakawn Vana pa Team leh YMA Armed veng Branch te in tumin, YMA Armed veng Branch te an Champion a, kum 1987 atang khan Central YMA Football Tournament hi tun thlengin la buatsaih a ni.