Aizawl: Union of Evangelical Students of India – Mizoram chuan State Annual Council vawi 13-na Pachhunga University College-ah June 12&13 khan an hmang.
Evangelical Union (EU) tia hriat lar UESI hi post-matric zirlaite zinga rawngbawlna a ni a, all India huap a ni. Mizoramah pawh November 22, 1975 atanga tun thleng hian district hrang hranga Higher Secondary School leh college hrang hrangah rawngbawlna an kalpui a ni.
He State Annual Council-ah hian thupui atan, ‘Rooted and Built Up in Christ’ (Colossians 2 :7) / ‘Kristaa zung kai leh rem chhoh’ (Kolossa 2:7) tih chu thlan niin, he khawmpui Speaker chu Dr. Lalmalsawmi Hmar a ni. Heng bakah hian Pro Pastor Lalnunpuia, Presbyterian Kohhran Bethlehem Venglai Pastor Bial leh Rbt. T. Lalrinmuana, Baptist Church of Mizoram, Lunglei te chu Resource Person an ni bawk.
EU (college zirlai) leh EGF (EU zirlaite enkawltu graduate-te) hmun hrang hrang atangin an kalkhawm a, khawmpui palai zawng zawng hi mi 150 an ni.
Kum thar 2025-2026 chhunga UESI-MIZORAM rawngbawlna tur kawng hrang hrang ruahmanna rorel inkhawm neih niin, rorel palai mi 60 an tel thei a ni. Heng bakah hian programme benglut tak tak neih a ni a, tunlai thalaite mamawh zawhna leh chhanna tam tak ngaihtuahho a ni bawk.
He khawmpui hi PUC Principal, Prof. H. Lalthanzara’n a telpui a, a inhawnna avangin UESI-Mizoram chuan PUC Principal chungah lawmthu an sawi.