ITI Veng Branch YMA chuan kumin YMA Day thilpek ITI Veng, Vanapa Section a cheng, Lalrinmawia In chu an sak that sak a. He in sak hi Inrinni zing khan Central YMA President Lalhmachhuana’n a hawng.
Hawnna inkhawmah Central YMA President Lalhmachhuana chuan, YMA hi tanpui ngaite tanpuitu, pawl zahawm leh thianghlim a ni a. Hemi a nihna tilang thei tura a mamawhtute tana thil hlu leh ropui tak, in sak sak a ni chu lawmawm a tih thu a sawi a. A tihsaktu tan leh a dawngtu tan he ni ah hian hlimna leh lawmna min thlen a ni, a ti.
CYMA President chuan, mi dangte tan malsawmna thlentu leh mi dang tana thil tha titu, tlawmngaihna thinlung neitu nih tum zel turin kal khawmte a chah bawk.
Kum 2025 YMA Day thilpek atana ITI Veng Branch YMA ten ‘Kum 2025 YMA Day Thilpek’ hawnna inkhawm hi ITI Veng Branch YMA Vice President M.S Dawngliana Hrahsel chuan a kaihruai a. Upa Lalnuntluanga Pachuau-in Pathian hnena hlanna hunserh a hmang a ni.