Aizawl: Chief Minister Lalduhoma’n YMA chu a din tirh phat atangin tanpui ngaite tanpuitu, Zofate tana pawl tangkai leh zahawm a la ni reng a. A hlutna hi a hniam thei lo tih a sawi.
Inrinnia a bial chhung khua, Neihloh Branch ten YMA Day an lawmna a hmanpuinaah Serchhip bialtu MLA ni bawk, Lalduhoma hian khawvel hmun hrang hranga awm YMA member zawng zawngte YMA Day chibai a buk a. Mi thenkhat, YMA ropuizia la hmu fiah lo an awm a nih chuan lungngaihna leh harsatna an tawh niah an la hmu ngei dawn a. An fel vang emaw, an that vang emaw, ni lovin Zofa an nihna vang ringawtin YMA hian a la tuamhlawm dawn a. An dam laia a tuamhlawm ta lo a nih pawhin an ruang tal chu zah takin thlanmualah a phum ngei dawn tih a sawi.
Lalduhoma chuan tun hnaiah ruahpui vangin chhiatna an tuar nasa a, chhiatna thlenna apianga tanpuitu langsar ber chu YMA te an nih thu sawiin, “An tanpuina dawngtu, a bikin hnam dangten nasa takin an lawmna thu social media lamah an rawn pho chhuak a. Mizo min tihmingtha em em a ni,” a ti.
Serchhip bialtu MLA hian ram leh hnam din chhuahna tur chu thawhchhuah tam tak nei ram an nih a, hnam dangte mamawh pe thei khawpa an san hun a ni tih sawiin, “Chu dinhmun thleng tur chuan YMA member ten hmathlir fel tak neia hna kan thawh a ngai. Kan ram siam tha tur hian hnam dangte an rawn kal dawn lo va, kan tu leh fate rawn tih atana dah chi pawh a ni lo,” tiin, tuna chhuan awm mek te hian thlentir tum turin a chah.
Neihloh khua hian tun hnai ruahsur nasa vang khan chhiatna a tuar nasa a. Khaw panna kawng rei tak a ping a, chenna in eng emaw zat a chhia a, khaw tuilak a chhia a, tanky awmna a him lo va. YMA hall leh Library pawh leiminin a hnawh avangin YMA day pawh hi Primary School lamah an hmang a ni.