Ningania Air India flight AI171 thlawhna tla ta black box pahnihna chu Pathianni khan hmuh leh a ni ta niin he thil chhuituten an sawi niin PTI-in a tar lang.
Cockpit voice recorder leh flight data recorder hmuh a ni ta hian mi 270 vel thihna thlenna thlawhna tlak chhan kha tam tak hriat theih a nih beisei a ni a. Thi zinga 241 kha a chuang mi 242 zinga mite an ni.
Black box pahnih hmuh a nih tawh thu hi Pathiannia Agmedabad-a Air India thlawhna tlakna tlawhtu, Principal Secretary to Prime Minister Narendra Modi, P K Mishra-a hnenah thuneitute an lo hrilh a. Mishra hian damdawi ina enkawl lai hliam tuarte a kan nghal bawk.
Aircraft Accident Investigation Bureau (AAIB) leh Airports Authority of India (AAI) chuan thuchhuah siamin, “Dr Mishra hian Circuit House-ah high-level review meeting a kaihruai a, chhawmdawlna, chhanchhuahna leh chhui hna thawk mek dante chu sorkar laipui leh state sorkar, AAIB leh AAI thuneitute nen an sawi ho a ni,” an ti.
“Thuneitute hian Dr Mishra hnenah hian Flight Data Recorder (FDR) leh Cockpit Voice Recorder (CVR) chu hmuh ve ve a ni tawh tih an hrilh a ni,” an ti.
AAIB chuan India atangin thlawhna tlak chhan chhui hna hi a thawk mek a, US National Transportation Safety Board (NTSB) chuan a hranin khawvelin dan a neih angin a chhui ve mek bawk a. US mi thiamte hian thlawhna kha American siam a nih avangin an chhui ve a ngai a ni.
Thlawhna tlakna hmun a tlawh hnuah Mishra chuan, “He vanduaina thleng hian min tihrehawm tak zet a, mi zawng zawngin pawh kan ti a, a tuartute kan tawrhpui em em a ni,” a ti.
Mishra chuan prime minister-in a tuartu chhungte puihna awm theih ang apiang tihsak a tum thu leh a buaipuitu agency hrang hrangte pawh an mamawh tihsak zel a tum niin a sawi bawk.