Aizawl: Tun thla chhunga kalpui tur, Dharti Aaba Janjativa Gram Utkarsh Abhiyan (DAJGUA) Awareness & Benefit Saturation Camp chu nimin khan Chief Minister Lalduhoma’n Planning & Programme Implementation Conference Hall-ah a hawng.
Hawnna inkhawmah chief minister chuan Mizoram mipui zaa 94 aia tam hi tribal an ni a. State dangah chuan tribal te hi hnam tlem zawk an ni hlawm a, Mizoramah chuan hnam tam zawk an ni. Chuvangin central sorkarin tribal te hamthatna a duan hi state pum pui hamthatna a ni nghal a. State sorkarin hmasawnna scheme a duan pawh tribal hamthatna tur a ni nghal zel tih a sawi.
Chief minister chuan dinmuan dinhmun an hriat avangin sawrkar laipui pawhin he awareness leh benefit saturation camp hi tha taka kalpui a, state dangte entawntlak khawpa tihlawhtling turin a beisei a. An beisei ang ngeiin a mawhphurtu zawng zawngten tha taka hlen theuh tum turin a chah.
Chief minister-in thu a sawi zawh hian kal khawm ten zawhna an neih te an zawt a, sawihona te an nei zui a ni.
DAJGUA hi sorkar laipui flagship programme niin, kum 2047 a India ram developed country-a hlankai tumna kalkawnga tribal mipuite zirtirna leh an mamawh zualpui pekna tura hmalakna a ni.
Sorkar laipui chuan a kalpuitu tur line department 17 a thlang a, heng line department te hian thawk hovin India ram tribal awmna district thlan chhuah 549-ah te hna an thawk ang. Mizoram bikah chuan line department 14-ten district 11-a mihring nuai li vel huamin khaw 383 ah kalpui a ni.