Inrinni zan atangin FIFA Club World Cup 2025 khelh tan a ni a, kuminah hian kalphung thlakin team 32 an tel mek.
Club World Cup hi kum 2000 khan FIFA Club World Championship tia bul tan niin kum 2001 atanga 2004 chhung khan chhan hrang hrang avangin an chhunzawm lo va. Kum 2005 atanga 2023 thleng khan kum tin December-ah an buatsaih thin a. Khawmualpui hrang hranga inelna sanga champion chauh an inel thin a, a tlangpuiin club paruk atanga pariat an inel thin.
Kum 2025 atangin kalphung an thlak a, team tel thei zat chu 32-ah an tipung a, kum tin inel tawh loin, FIFA World Cup ang bawkin kum li dan zela inel an titlu ta bawk a ni.
Kumina tel team 32-te hi group pariatah an inthen a, group hranga awmte hi an inkhel kual ang a, a sang pahnihten knockout round an thleng ang a. Round of 16, quarterfinal, semifinal leh final an khel chho dawn a ni.
Group stage hi June 14 atanga June 26 thlenga khelh tura ruahman niin, round of 16 chu June 28 atanga July 1 thleng an khel leh ang.
Quarterfinal chu July 4 leh 5-ah an khel ang a, semifinal chu July 8 leh 9-ah khelin final chu July 13-ah an khel ang.
Club lar deuh deuh an inlan nual dawn a, UEFA Champions League champion Paris St-Germain leh champion ngun ber Real Madrid, Bundesliga club lian Bayern Munich, English champion vawi 10 ni thei Manchester City leh Italian club lian Inter Milan te chu a langsar pawl an ni.
Europe khawmualpui pawn lam atangin Lionel Messi khelhna, Inter Miami an tel dawn a, anni hi Supporters’ Shield latu an ni a, a thlengtu USA aiawha tel an ni.
Club 32 zingah hian Europe atanga tel an tam ber a, team 12 an tel a. South America (CONMEBOL) atangin paruk an tel a, Asia (AFC), Africa (AFC) bakah North America, Central America leh Caribbean (CONCACAF) atangin team li theuh an tel a. Oceania atangin team khat an tel.
Mexican club Leon chu 2023 CONCACAF Champions Cup champion an nih avangin an tel zet a, club neitu chungchanga dan bawhchhiat an neih avangin FIFA chuan tel an phalsak leh ta lo va. Mexican club dang, Pachuca pawh a neitu chungchang avang bawkin tel an phalsak ta lo bawk.
Leon chu Court of Arbitration for Sport hnenah an zualko a, an lo hnawlsak a. An hmun ruak hnawh khat tur hian FIFA chuan Los Angeles FC leh Mexican club pakhat, Club America chu playoff an khelhtir a, Los Angeles FC hi an chak a ni.
A tir atanga a tawp thlengin match 63 a awm dawn a, khawpui 11-a khelmual 12-ah an inkhel ang.
Semifinal leh final chu National Football League (NFL) team New York Giants leh New York Jets te stadium lar tak, MetLife Stadium-ah an khel dawn a. He stadium-ah hian mi 82,500 an thu thei a, 2026 FIFA World Cup final khelhna atana an ruahman a ni nghe nghe.
An inkhelhna tur stadium zingah chuan American football stadium lar em em mai, Pasadena, California-a Rose Bowl chu entu len tamna ber a ni dawn a, mi 88,500 an leng a ni.
Champion team chuan $ maktaduai 40 an dawng dawn a, pahnihna pawhin $ maktaduai 30 an dawng dawn bawk a. Semi final lut thei teamte chuan $ maktaduai 21 an dawng ang a, quarterfinal thleng chinin $ maktaduai 13.125 an dawng ang a, round of 16 khel pha chinin $ maktaduai 7.5 an dawng ang.
Group stage khelh laia chak apiangin $ maktaduai hnih an dawng zel ang a, an inhnehtawk chuan inhnehtawk team pahnihte hian $ maktaduai khat ve ve an dawng zel dawn a ni.
- Group hrang hrang inthen dan:
Group A: Palmeiras, Porto, Al Ahly, Inter Miami
Group B: Paris Saint-Germain, Atletico Madrid, Botafogo, Seattle Sounders
Group C: Bayern Munich, Auckland City, Boca Juniors, Benfica
Group D: Flamengo, ES Tunis, Chelsea, LAFC
Group E: River Plate, Urawa Red Diamonds, Monterrey, Inter Milan
Group F: Fluminense, Borussia Dortmund, Ulsan HD FC, Mamelodi Sundowns
Group G: Manchester City, Wydad, Al Ain, Juventus
Group H: Real Madrid, Al Hilal, Pachuca, FC Salzburg