Aizawl: Social Welfare Minister Lalrinpuii chuan ruihhlo do hi ZPM party manifesto a nih angin sorkarna an chan tirh khan hma an lak nghal thu a sawi a; State Level Ruihhlo Do Committee muthlu tawh chu an kaihthawh leh thu a sawi.
Thawhtannia ZPM-in an party pisaa chhung inkhawmah Minister Lalrinpuii chuan, ZPM party policy a nih angin ruihhlo do hi sorkarna an chan tirh khan chief minister kaihhruaina hnuaiah hmalak nghal a ni a nih thu sawiin, “State Level Ruihlo Do Committee lo muthlu tawh chu kaitho lehin hmalakna thuang hnih – Supply reduction, Demand leh Harm reduction-ah kan then,” a ti a. Supply reduction chu Excise department chan niin, demand reduction hi Social Welfare chan niin, Manifesto bawhzuiin theihtawpin hma a la mek tih a sawi.
Health Minister ni bawk Lalrinpuii chuan, “Nasha Mukh Bharat Abhiyaan leh National Action Plan for Drugs Demand Reduction scheme kan kal pui bakah central sorkar scheme ringawt kan ram tan a tawk loh avangin, kohhran leh NGO-te nen tanghoin sorkar chuan theihtawp a chhuah mek a ni,” a ti.
Home leh centre te mumal zawka kalpui turin ‘The Mizoram Drug Treatment & Rehabilitation Centre Accreditation Rules’ hmang turin an inbuatsaih tih sawiin Lalrinpuii chuan, home hrang hrang enkawltute training an pek bakah, Aizawl khawpuiah ruihhlo avanga harsatna tawkte harsatna sukiang turin ‘Hulhliap’ short Stay Centre din a, hetah hian ni 10 chhung chu doctor leh nurse te enkawlna hnuaiah Detoxification kalpui a ni a nih tur thu leh ni nga dang Psychologist ten councelling an kalpui leh dawn a, ni nga dang chu spiritual councelling neihpui tum niin, hemi hnu hian an dinhmun azirin an chhungte hnena haw thei tura buatsaih an tum a, la inpeih lo deuhte chu centre a awm chhunzawm thei turin ruahmanna an siam thu a sawi bawk.