Aizawl: Larsap Gen. Vijay Kumar Singh chuan tun dinhmunah Aizawlah hmun awl a tam tawh loh avangin sorkar project kalpui turin Aizawl khawpui chhung chauh melh lova hmun dangte pawh ngaihven tel zel a tul thu a sawi.
Nimin khan Larsap Gen. Singh chuan Ministry of Road Transport and Highways (MoRTH), National Highways Logistics Management Limited (NHLML) leh Urban Development & Poverty Alleviation (UD&PA) Department hotute chu Raj Bhavan-ah a kawm a. Sorkar laipui ‘National Ropeways Development Programme – Parvatmala Pariyojana’ hmanga Mizorama Ropeway siam a nih theih nana pawimawhte a sawipui.
Larsap chuan khawpui tawt zel tur ven nan ruahmanna hrang hrang neih a pawimawh thu leh hmalak ran chu thil tihmakmawh a nih thu sawiin, tun dinhmunah Aizawlah hmun awl a tam tawh loh avangin sorkar project kalpui turin Aizawl khawpui chhung chauh melh lo va, hmun dangte pawh ngaihven tel zel a tul thu a sawi.
Inkalpawhna leh mipui veivahnate chu ngaihven hmasak ngai a ni tih sawiin Larsap chuan, tlangrama chengte inkalpawhna atana sorkar laipui project tha tak, Parvatmala chu tangkai taka hman a nih theih nana hmelhriata chhawr tangkai a tul thu a sawi a. Line Department dangte nen pawha inrawntlanga he scheme hi chhawr tangkai dan tur ngaihtuah tlan a tul thu a sawi bawk.
MoRTH Addl. Secretary Vinay Kumar chuan Mizorama Ropeway project kalpui turin theihtawp chhuahpui an inhuam thu a sawi a. An hnuaia kalpui Parvatmala chu tlangrama inkalpawhna siam nana project tangkai tak a nih thu leh hemi atanga revenue zaa 90 chu khawtual hmasawnna thawh nana hman theih a nih thu a sawi.
He hunah hian UD&PA Secretary Lalmalsawma Pachuau chuan PowerPoint Presentation hmangin Aizawl khawpui leh a chhehvela Ropeway Corridor hrang hrang din tura ruahmanna siam, ‘Ropeways Under Aizawl Sustainable Urban Transport Project (ASUTP)’ chungchang a sawifiah a ni.