Aizawl: India rama nurse chawimawina sang ber National Florence Nightingale Award dawngtu V. Lalhmangaihi hnenah Health Minister Lalrinpuii’n chawimawina nimin khan a hlan.
Health Minister hian a pisa-ah May ni 30-a Nurse chawimawina sang ber,, National Florence Nightingale Award dawngtu V. Lalhmangaihi, Nursing Officer, Civil Hospital Aizawl hnenah Mizoram sorkar aiawh chawimawina thuziak mawi leh tangka fai, Rs 50,000 a hlan a ni.
Chawimawina hun an hmanag Healh Minister chuan India ram state hrang hrang mipui tam tak karah Mizo zinga Florence Nightingale Award hial dawng thei an awm chu lawmawm a tih thu a sawi a. A dawngtu V. Lalhmangaihi thawhrimna leh inpekna hi a entawn tlak a tih thu sawiin, nursing care-ah hmasawn zel turin thawktute a chah nghal.
Award dawngtu V. Lalhmangaihi pawhin lawmman dawng thei tura a tul anga buaipuitu, Mizoram Nursing Council chungah lawmthu a sawi a. Mizoram sorkarin Cabinet pawmpuina thlapa kumin atanga dan mumal tak siama lawmpuina citation leh cash award Rs 50,000 a hlan tel chu thinlung taka a lawmzia thu a sawi.
H&FW Joint Secretary Lalnunmawii Ralte kaihhruai inkhawmah hian H. Lalengmawia IAS, Secretary HFW leh Dr. SR Ngurchamliana, Director HME te pawhin lawmpuina thu an sawi a. He hunah hian Mizoram atanga he award lo dawng tawhtute zinga Aizawl District-a awm mi panga te pawh sawm tel an ni bawk.