Aizawl: Chief Minister Lalduhoma hova nimina Land Resources, Soil & Water Conservation department hnathawk thlirletnaah kum tharah chuan sawhthing grading kalpui a nih tawh loh tur thu sawi a ni.
Thawhlehniaa Secretariat Conference Hall-a thutkhawmah Chief Minister Lalduhoma chuan sorkarin thil thar an ching chhuak nual a, sorkar hnathawkten tha taka an lo thlawp a beisei thu sawiin, “Hna hi thawh chak kan duh, kan ram hian hmasawnna hmel hi hmu thuai thuai ila kan duh a, chuvang chuan heng thil thar te hi kan kalpui a ni,” a ti.
Thutkhawmah hian hmunphiah hralhna chungchangah kumina grading kalpui kha loneitute tan harsatna a thlen avangin kum tharah chuan grading hi kalpui tawh loh tur a nih thute, Soil department allocation of business thenkhat en that a ngaih thu te, coffee hi soil department crop-ah la dahzui zel tur thu te, departmental works kalpui a nih hian department thenkhatten an project-ah GST an chhut tel lo thin a, sorkarin chhiah tam tam tak a chan thin avangin, sorkarin departmental work kalpui dan tur a duan ang thlapa kal thin tur thu te, Chief Minister’s Rubber Missions a lo hlawhtlin leh zual theih nan Rubber Clustee Link road ngaihpawimawh dan dap nise tih thute sawi a ni.
He hunah hian LRS&WC Minister Lalthansanga leh Lalsangliana, Secretary, LR, S&WC ten thu an sawi a. Thutkhawmah hian TBC Lalvenchhunga, Adviser to CM (Finance & Planning) leh Vanlaldina Fanai, Commissioner & Secretary to CM bakah Planning leh Finance Department official te an tel bawk.
- Meeting-a tarlan thil pawimawh zual dangte:
- CM Rubber Missions thawh khatnaah Rs. 2798.13 lakh dah a ni a, kumin a kum khatnaah hian Rs. 1364.14 lakh expenditure sanction tawh a ni. Sum hi NABARD RIDF XXX atanga hmuh a ni a, Kolasib leh Mamit district ah kalpui phawt tur a ni. Kum tharah district dangah tih zui zel a ni ang. Kum tin hectare sang khat zel phun belh tum a ni a. Kuminah loneituten an phun hman ngei theih nan a chi supply hi rang taka bawhzui tur a ni.
- Rubber Rolling Machine set hi rubber ching mek ten an mamawh em avangin cluster ten inhmantawm tur subsidy-a pek atan Handholding atangin za (100) tal ngaihtuah ni se, tih te a ni.
- Saitual Office cum Quarters enkawlna tur sum ennawn ni se tih a ni.