March thla tira 15th Hockey India Senior Women National Championship 2025-a Mizoram tana bronze medal latu Mizoram team chu Thawhlehni chawhnu khan Sports Minister Lalnghinglova (Tetea) Hmar chuan a pisaah lawmpuina hun a hmanpui.
Panchkula, Haryana-a inelnaah hian Mizoram hi semi-final ah tournament a champion ni zui ta, Jharkhand laka tlawmin pathumna inchuhnaah Maharashtra an hneh a ni.
Sports minister chuan ram pum huapa medal late chu lawmpuina hun han hmanpui nghal an duh rualin player-te an haw rual thei si lo va, hun remchang hmasaah an huaihawt ta tih a sawi.
“Tun hnaia kan player langsarte Thenzawl Hockey Academy atanga chhuak an ni zel a, academy pakhat atang national leh international player tuna kan neih ang zat an chhuak thei a nih chuan a inkhel thinte hi tam se chuan khitah kan awm ang,” tiin hockey chu hmasawnna tur chuan mipui zingah tihnun leh a pawimawh tih a sawi.
Tetea chuan India-in kum 2036 Olympic hmathlir neiin inbuatsaihna a kalpui mekah Mizo infiammi a tam thei ang ber tel an duh tih sawiin, “Hockey hi Olympian kan neih theihna tur kawng kan neih hnai a ni a. Theihna kan nei tih a chiang a, India team-a kan lan theih chuan Olympic khel thei kan nihna a hnai nghal hle a ni,” a ti.
Mizoramah hockey khel thin an tam loh ngaihtuaha hlawhtlinna neite thlirin theihna a that thu a sawi a, mumal taka inchher theihna tur academy leh hmunhma dangte pawh ngaihtuah a la nih tur thu a sawi bawk.
Lawmpuina hunah hian Mizoram State Sports Council (MSSC) Secretary Henry C. Lalrawnkima chuan hockey ground neih belh tura hma lakna kal mekte leh a awm tawh sate tihchangtlun tuma hma an lak dante a sawi a. Hockey Mizoram Joint Secretary K. Lalchamreii’n Mizoram team report a pe bawk.
He hunah hian Hockey India Senior Women National Championship 2025-a Mizoram team official leh player thenkhatte bakah MSSC-a officer-te leh Hockey Mizoram hruaitute an tel a ni.