Mizoramah hian autonomous district council (ADC) pathum awmin, thangthar zawkteah duh lohna leh hnawk tihna lian deuh deuhin lang thin mah se, thiah ngawt theih a ni tawh bik lo a, a la awm tluang chho zelin a rinawm.
Hetih lai hian kan ADC pathumte hi an huamchhungah chuan sorkar na kengtu, mipui kut leh ke tak meuh an nih avangin an pawimawh a, heta tanga thlantlin, Mizoram sorkar a minister leh MLA hial ni zui tate pawh an awm nual reng a ni.
Sawi tak angin an huamchhungah chuan thu an nei a, an thurel leh thutlukna engkim mipuite ngaihchan leh ngaihven a nih miau avangin an pawimawh a, sorkar nghet tak an din pawl a tul hle.
Hetih lai hian kan ADC te hi state a sorkar-na a inthlak apiangin an buai zui ziah ni hian a hriat a, an nghet lovin, thenkhatah phei chuan rorel hlei thei lovin an CEM te paihthlak chu hna pui berah an nei ni mai hian a hriat thin.
Party aiawha thlantlin ni theuh mah se anmahni tan chakai an khawrhzui ni mai hian a hriat thin a, party dangah an uire hreh lo a, sorkar siam hlei thei lo khawpa an term chhunga chetna a awm ta fo maite hi a pawi a, an huamchhung mipuite zah lohna dik tak a ni.
Hamthatna leh duhsakna hlawh duh lo kan awm lo a, mah se bial mipuite aiawha thlantlin an nih avangin sorkar na nghet tak an siam theih a tul vek hlawm. State lam atanga nawrna a lo awm a nih pawhin sorkar a kal theih loh dawn aichuan thutlukna huaisen tak an siam theih a tul hle fo.
Hetianga inleh burh burhna leh inpaihthlakna thleng reng fo tura ngaihna hi a lian chho zel ang tih a hlauhawm a, thangthar zawkten hnawk tihna leh ADC chawpa thiat tura hmalakna hi an kalpui lian telh telh ang tih a hlauhawm hle. Chuvang chuan kan ADC lama nawi viauna hi tireh turin huaisen takin kalphung dik zawk tum ngei hlawm teh se.