Ningania London Gatwick pana thlawk Air India thlawhna a tlak hnua an Boeing 787 thlawhna neihte endik tura tih chu endik zawh a nih hnuah Directorate General of Civil Aviation (DGCA) chuan engmah him lohna a awm lo tih Thawhlehni khan a sawi.
Thlawhna lam viltu hian Air India B787-8/9 thlawhnate chu June 13 khan a dinhmun ennawn tura thupek a tichhuak a. Thawhlehni khan thlawhna leh a kaihhnawih thil dang endiknaah a him chin aia hniam engmah a awm hran lo tih a sawi a ni.
Ahmedabad atanga thlawk chhuak Air India thlawhna, Boeing 787-8 Dreamliner chu Ningani khan tlain a chuang mi 242 zinga 241 an thi a, a tlaknaa a delh mi 30 an thi bawk a, hei hi India-a kum 30 chhunga thlawhna chesual rapthlak ber a ni.
Air India hian Boeing 787 thlawhna hi 33 a nei mek a. Heng zinga pali hi MRO (maintenance, repair & overhaul) facility hrang hrangah endik mek a ni tih DGCA chuan a sawi.
Thlawhna ang 26 chu Thawhlehni khan endik zawh a ni a. “Naktuk (Nilaini)-ah a dang pakhat endik a ni ang a, VT-ANG leh VT-ANT telin a dang parukte chu Delhi-a AOG (aircraft on ground)-in an awm mek a ni,” an ti.
DGCA chuan Air India hian mumal tak leh a hun tak zelah an thlawhna khawl enfiah hna an kalpui a, a himna atana a pawimawhte pawh a hun tak zelah an tifel thin niin a sawi.
Ningania an thlawhna a tlak ni-ah khan Air India hian thlawhna 90 a tir chhuak a, an zinga 50 chu B787 a ni a. Thlawhna thlawk tur paruk chu an zin tur a thulhtir a, heng zinga panga hi B787 a ni.