Aizawl: Agriculture Minister PC Vanlalruata hovin nimin khan College of Horticulture, Thenzawl din champha vawi 9-na lawmna hun hman a ni.
Academic cum Administrative building, College of Horticulture-ah hun hmanah PC Vanlalruata chuan, College of Horticulture Thenzawl din champha vawi 9-na lawm theia an awm chu thawktute leh zirlai te thahnemngaihna vang a ni tiin a lawmpui thu a sawi a. Zirtirtu tha tak tak leh state hrang hrang atanga lokal zirlaite thawhrimna avangin college hi zirna tha tak leh zirlai tha chher chhuaktu a nih thu sawiin, Mizoram tan hmasawnna thlentu pawimawh tak a la nih zel tur thu a sawi.
Agriculture lama zirna leh thiamna te hi loneitute leh kuthnathawktute hlawhtlinna thlentu a ni tiin PC Vanlalruata chuan, “He college ngei pawh hian an thiamna hmangin kuthnathawktute vawi tam tak an lo tanpui tawh thin a ni,” tiin an thiamna leh theihnate Mizoram tan tangkai taka hmang chhunzawm turin a chah.
He hunah hian Dean Dr. Shri Dhar pawhin thu a sawi bawk.
College of Horticulture hi June ni 18, 2016 khan Selesih ah din tan a ni a. Kum 2019 July ni 1 atangin tuna an awmna Thenzawlah hian an awm tan a ni. College of Horticulture-ah hian Mizoramin seat paruk quota a nei mek a ni.