Aizawl: Health Minister Lalrinpuii kaihhruaiin nimin khan Mizoram State AIDS Control Society (MSACS) Governing Body chu Secretariat Conference Hall, MINECO-a thutkhawmah kum nga kalta vel atang khan Mizoramah HIV vei thar an tlem tial tial tih sawi a ni.
MSACS Chairman ni bawk Lalrinpuii chuan, Mizorama mihring awm zat atanga chhutin (prevelance) HIV vei mi zaa 2.73 an awm mek a, India ram puma a sang ber an ni chu veiawm a tih thu sawiin, HIV do zel turin chak zawk a hma lak a tul thu a sawi.
Health dept Secretary H. Lalengmawia pawhin, ‘The HIV & AIDS (Prevention & Control) Act, 2017’ chuan hna laknaa induhsak lohna lakah a veng a ni tih sawiin, HIV veite chu inthlahrung lova hna dil tur an nih thu a sawi.
He huna MSACS Project Director Jane Rinzuali Ralte sawi danin, kum nga kal ta vel atang khan state chhungah HIV vei thar an tlem tial tial a. April, 2024 – March 2025 chhung khan Mizorama ART Centre 14 ah HIV vei thar mi 2,069 ziah luh an ni a. ART dawngte zingah mi dang hnena kaichhawng thei lo tur (viral suppression) mi zaa 97.7 an awm.
Mizoram State Blood Transfusion Council chuan Excellence in Blood Donation 2023-24 lawmman dawngin, hmarchhak state-a North-Eastern state-te zinga titha ber a nih thu a sawi bawk.
He hunah hian MSACS-a contract a lakte hnathawh dan enho a nih bakah, MSACS Governing Body member thar ruat dan tur te, Annual Action Plan 2025-26 leh State budget-a HIV dona tura sum hman tur dah a tul thute sawiho a ni.