University of Melbourne-a Doctor thiam tak takte chuan hmeichhia te ang bawkin mipate hian fa neih an duh a nih chuan an ei leh in-ah ‘folic acid’ tamna leh vitamin te hi an ei tha tawk tur a ni a, zial zuk bansan tur a nih bakah coffee leh zu in tlem tur niin an sawi mauh mai.
He zirchiannaah hian mipa 800 chuang zette chu enchhin an ni a, an zinga 59% te hi ei leh in duhtui vak lo leh folate emaw vitamin D emaw ei ngai lo an ni. Hei vang hian an sperm (chi) chuan nasa takin a nghawng a tuar a, nupuite nena nau siamna kawngah harsatna nasa tak an tawh pah.
Chutih laiin, mi 123 te chuan nundan tha taka nungin ei leh in pawh an duhtui hle a, chutianga thla 2-3 zet an awm hnu chuan an chi chu a nung sar mai a, hmeichhiate pawhin nauchhiatna nei lovin hrisel takin nau an pai vek, a thente chu kum 38 chunglam te an ni hial a, mahse an invawn that bakah ei leh in tha tak an taksain a dawn avangin an that pui hle.
Dr Clark-a chuan, “Naupai tumna hi mipakhat chauh tih theih a ni lova, mi pahnihina project mumal tak an neihna atang chauha intan a ni. Tin, naupai chungchang hi nupaa sawi dun chi a ni a, hmeichhiate tih tur bik a ni reng reng lo.
“Nau hrisel tak nei tur chuan Nu ber a pawimawh hle a ni’ tih hi mipate bulah pawh sawi tur a ni a, a chhan chu- a chanve-ah khan mipate hian mawhphurhna an nei ve tlat mai a, an pawimawh tel tih an hre tur a ni,” a ti.