Aizawl: Mizoram State Policy Coordination Committee (MSPCC) chu an Vice Chairman Dr KC Lalmalsawmzauva, Adviser to chief minister hovin Planning & Programme Implementation Department Committee Room-ah Mizoram Liquor (Prohobition) Amendment Act 2025 kalpui dan relin an thukhawm.
Thutkhawmah hian Dr. KC Lalmalsawmzauva chuan, Mizoram chhung ngeia thei tharchhuah hmanga thianghlim leh mumal taka Wine siamchhuah a nih theih nan, Mizoram Liquor (Prohibition) Amendment Act 2025 chu duan a nih thu a sawi a. Thei tharchhuaktute tan inhralhna tha zawk buatsaih sakte, hemi kawnga hma la tura entrepreneur hip nante, zin mite hip nan leh, dan leh tehfung hrang hrang behchhan chunga thianghlim taka wine sawngbawl a nih theih nan hemi kaihhnawih sorkar department hrang hrangte, Winery neitute leh kuthnathawktute tanrualna a pawimawh thu a sawi.
Excise & Narcotics department Commissioner Z.Lalhmangaiha pawhin Mizorama zu khuahkhirhna lo kalpui tawh thin dan leh Mizoram Liquor (Prohibition) Amendment Act 2025 danglamna a sawi fiah a, he dan thar hian Autonomous District Council pawh a huam thu a sawi.
Food & Drugs Administration aiawhten Wine leh Beer kaihhnawiha Food Safety and Standard Authority of India hnuaia inkaihhruaina hrang hrang ngaihthlak niin, Wine-ah chuan ethyl alcohol chu za zelah 7 – 15.5 a nih tur thu leh Beer-ah chuan 5 – 8 a nih tur thu tarlan a ni a. Mizoram chhungah Winery pali – Hnahlan, Champhai, Tlangsam leh Sesawng-ah te a awm thu sawi a ni.
Thutkhawmah hian hmalakna hlawhtling taka kalpui a nih theih nan thei chi khat, a huhoa hmun khat a chin (Cluster approach) a pawimawh tur thu te, a sawngbawl kawnga endikna kalpui dan turte, a sawngbawltu turte leh zuar turte phalna pek dan tur te sawiho a ni a. Winery lama tui, bultan tumte leh winery-a thawk tur ten thiamna rintlak an neih theih nan training buatsaih sak thinte sawi ho a ni.