Aizawl: Mizoram-a private hospital inzawmkhawm pawl, Non-Government Hospital Association of Mizoram (NGHAM) chuan sorkar hospital-ten Mizoram Universal Health Care Scheme (MUHCS) hnuaiah cashless-in damlo enkawl hi kalpui chhunzawm se, private hospital-ah erawh phai lam hospital thenkhat sorkarin a ziah luh loh leh pawm loh (non-empanelled hospital)-a an phalsak ang tho hian damlote hian an bill hi MUHCS Package Rate ang hian reimburse/bill leh theih anga sorkarin a kalpui thei a nih phawt chuan MUHCS chu an thlawp nghal tur thu an sawi.
Nimin khan NGHAM chuan MUHCS an la zawm theih loh chhan hrang hrangte sawi fiahin thuchhuah an siam a. MUHCS hi damloten damdawi in awmna bill an chawi ngai lo (cashless) tura ruahman leh kalpui a ni chu hospital-ah ni tina pawisa lut a awm dawn lo va, ni tina damlo enkawlna senso a hautak tham em avangin ba ringawta damlo enkawl hi private hospital-ten an tlin loh thu an sawi.
MUHCS hnuaia damlo enkawlna man hi tuna Mizoram-a private hospital-a an rate hman tlangpuite aiin zaa 50 – 80 velin a hniam zawk a. Mizoram-a private hospital-ten damlo an enkawlna man leh room mante hi phai lama private hospital tam berte aiin nasa takin a tlawm zawk a, chumi aia tlawm leh zuala damlo enkawl hi an dinhmunah thil theih loh tluk a ni a. Hei hian damlo an enkawlte hi enkawlna tha (quality service & care) pek kawngah nghawng tha lo a neih mai a hlauhawm bakah an damdawi in te hian tlakchhiat an hmabak a, thawktu tam tak (Doctor, Nurse leh thawktu dang) hlawh pek tur an nei lo thuai ang a, hna an chan phah dawn bawk tih an sawi.
NGHAM chuan phai lama Corporate/Private Hospital, rate sang tak hmangte nen Mizoram sorkarin MUHCS inremna an ziak thei hi a tha an tih rualin, Mizoram private hospital te tana rate chhawpsak nen a inang lo hle tih an hriat thu an sawi a. Hei bakah, MUHCS hnuaia damlo an enkawl tur te hi phai lam hospital-te tan chuan tlemte chauh an nih avangin, a bathlau (cashless)-a enkawl hi an tan thil harsa a nih loh thu sawiin, “Mizorama private hospital-te tan erawh damlo kan enkawl zawng zawng deuhthaw hi MUHCS hnuaia enkawl tur an nih dawn avangin cashless ringawt chuan enkawl an harsa dawn a ni,” an ti.
Sorkar nen MUHCS chungchangah inbiakna an neih lai mekah, rate leh a kaihhnawih thil dangah tihfel harsa leh ngaihtuah tur tam tak la awma a lan avangin, mipuite harsatna tawh mek hi awlsam taka tihtawp anih theih nan sorkar sum senga enkawl, sorkar hospital-te hian MUHCS hnuaiah hian cashless-in damlo enkawl hi kalpui chhunzawm se, private hospital-ah erawh phai lam hospital thenkhat sorkarin a ziah luh loh leh pawm loh (Non-Empanelled Hospital)-a an phalsak angin damlote hian an bill hi MUHCS Package Rate ang hian reimburse/bill leh theih anga sorkarin a kalpui thei a nih phawt chuan MUHCS chu NGHAM-in an thlawp nghal tur thu an sawi bawk.