P&E Minister F Rodingliana’n Indian Electrical & Electronics Manufacturers’ Association (IEEMA) huaihawt ni hnih awh, North-East Power Conclave-ah Guest of Honour niin Thawhlehni khan a telpui a, member-te chu Mizoram power sector-a investment tam zawk ti turin a ngen.
Conclave hawnna inkhawmah thu sawiin P&E minister chuan Mizorama ZPM sorkar party manifesto chu power-a intodelh anih angin, sorkarin chak takin hma a lak mek thu a sawi a. Hydel project leh solar hmanga kawlphetha tam zawk thar chhuak tura bul tan mekah IEEMA member-te chu Mizoram power sector-a investment tam zawk ti turin a ngen.
Mizoram hmun hrang hrangah solar plant siamna tur ruahman a nih tawh thu sawiin F Rodingliana chuan, “Solar plant bunna tur ramte hi a thlawna hman hawhtir tur a ni a. A thawh khatnaah solar plant bunna tur, Expression of Interest (EOI) hmun nga atan chhuah tawh a ni a, a dangte pawh a tahtawla hmalak zel tur a ni,” tiin, he hmalaknaah IEEMA member-te chu tel turin a sawm.
Power Secretary K Lalrinzuali pawhin thu sawiin, Mizoram chu tlangram kilkhawr, fur ruahtui tamna hmun a nih avangin a mil tur hmanrua leh bungraw zangkhai leh daih rei duang chhuak turin IEEMA member kalkhawmte a chah.
IEEMA hnuaiah hian India rama electrical leh electronic bungrua siam chhuaktu company tam zawk an inziaklut a, India rama heng bungrua siamchhuah zaa 90 lai hi an member-te kut chhuak a ni. Tun dinhmunah hian member 1,200 chuang an awm mek a ni.