The Smashing Machine’ Mark Kerr chu 2025 chhunga UFC Hall of Fame-a lak luh tur zingah a tel.
UFC heavyweight champion vawi hnih lo ni tawh Kerr hi Pioneer Era-ah chuan UFC Hall of Fame-a lak luh tur member 21-na chiah a ni dawn a. June 26-ah lak luh a ni ang a, Dwayne ‘The Rock’ Johnson chuan a la lut dawn a, October 3-a tlangzarh tur, ‘The Smashing Machine’ tih film-ah pawh The Rock hi Kerr lemah a chang ang.
UFC president leh CEO Dana White chuan, “Mark Kerr hi wrestler tha zet mai, PRIDE-ah pawh tel tawh a ni a, he infiamna chawisangtu pawimawh tak a ni,” a ti.
Syracuse-ah college wrestling-ah a inhmang thin a, a hlawhtling thawkhat hle a. Kum 1992-ah khan NCAA Division I title a la nghe nghe a. 1996 Olympics-ah khan a tel thei lo chiah a, he mi hnuah hian mixed martial arts lamah a zuang lut a ni.
January 19, 1997-ah khan MMA huanga a vawi khatna atan a inlan a, World Vale Tudo Championships-ah a tel a, a chak ber a, chu mi hnuah UFC-ah a lut ve leh a ni.
Kum 1997 khan Kerr hi vawi hnih UFC heavyweight tournament-ah a champion a, he inelnaah hian vawi li a chak a, a chak dan pawh submission vek a ni a. UFC tournament vawi khat aia tama champion thei panga zingah telin Hall of Fame-a lak luh tawh – Royce Gracie, Mark Coleman, Dan Severn leh Don Frye te huangah a tel ve thei dawn a ni.
Kerr hi Pride mai bakah MMA inelna dangah pawh a tel nual a, a vanglai hian vawi 15 a chak a, vawi 11 chak lovin kum 2009-ah chawlh a puang a ni.