All India Football Federation (AIFF) chuan India national football team head coach Manolo Marquez chungchang chu Pathianni hian an ngaihtuah dawn.
Marquez-a kaihhruaina hnuaiah India chu beisei angin an che fuh lo va, hei vang hian mi tam tak chuan an sawisel nasat phah hle a. Tun hnaiah result an nei tha lo bawk nen, bâng tura duhtu hi an pung mek.
June, 2024-ah khan khatih laia FC Goa enkawltu, Marquez hi India team enkawl tura ruat a ni a. Igor Stimac a thlak hnua a kaihhruaina hnuaiah India chuan vawi riat an khel tawh a, hengte hi friendly match paruk leh inelna pangngai vawi hnih a ni a. Hengah hian vawi khat chiah an chak a, March thlaah khan Maldives an hneh a ni.
An khelhpuite nen vawi li an inhnehtawk a, vawi thum an tlawm a, inelna pangngaiah chak hmel an la hmu lo a ni.
AIFF President Kalyan Chaubey chuan, “Manolo Marquez hi coach fak hlawh tak mai, mi pawhin an dah san deuh a ni a. India ram football kalphungte a hre chiang a, player-te pawh a hre hlawm hle a. Tun hnaiah erawh result tha an neih theih meuh loh avangin zawhna a tam phah a, bân a nih dawn leh dawn loh thlengin zawhna kan dawng a ni,” a ti.
“June 29-ah hian Executive Committee kan thu dawn a, a chungchang hi kan ngaihtuah ang,” a ti.
AFC Asian Cup qualifying an khelhah India chuan 0-1 in Hong Kong an hneh lo phawt a, goal inpe loin Bangladesh nen an inhnehtawk bawk a, hei vang hian sawisel an hlawh nasat zual phah hle a ni.