Aizawl: Mizoram State Cooperative Union (MSCU) General Assembly, vawi 36-na chu nimin khan Dawrpui Multipurpose Hall, Aizawlah neih a ni a, Cooperation Department Minister P.C. Vanlalruata’n khuallian niin a hman pui.
Khuallian PC Vanlalruata chuan Cooperative Society chu UNO pawhin a ngaih pawimawh thu leh, hmasawnna tluantling sustainable development a awm theih nan Cooperative Society din chu thil pawimawh tak a nih thu a sawi.
Minister chuan kuthnathawktute tan cooperative society din chu thil pawimawh tak a nih thu sawiin, society kaltlanga harsatna tam tak sut kian a nih theih thu a sawi a. Thalai lehkha thiam zawkte’n cooperative movement ngaih pawimawh nachang an lo hriat deuh deuh theih nan, College leh University zirlaite tan intihsiakna tur ruahman a nih thu a sawi bawk.
Assembly hi K. Lalchamreia, President, MSCU in akaihruai a. Mizoram hmun hrang hrang atangin palai eng emaw zat an kalkhawm a ni.
He hunah K. Laldawnglian, MLA leh John L.T. Sanga, Registrar of Cooperative Societies ten thu an sawi bawk.
K. Lalduhawma, Chief Executive Officer, MSCU sawi danin, tun dinhmunah Mizoramah Cooperative Society 1,326 awm mekin, Primary Level, District Level leh State Level-ah te then hran leh an ni.