Aizawl: Health Minister Lalrinpuiin nimin khan Mizoram State AIDS Control Society (MSACS)-in an buatsaih, ruihhlo hman sual kawnga inzirtirna ‘One Day Seminar On Drug Abuse’ a hmanpui.
Taxation Department Conference Hall, MINECO-a hun hmanah Minister Lalrinpuii chuan, ruihhlo tel lo Mizoram neih a nih theih nan ruihhlo lut tur ven leh ruihhlo hmangtu titlem tura hmalakna bakah ruihhlo nghawng tha lo siamthat hna sawt zawk a thawk tur chuan department hrang hrangte tanrualna a pawimawh thu a sawi a. World Health Organisation chuan ruihhlo ngawl veina hi natna tihdam theih a nih thu sawiin, he natna tidam tur hian mi thiamte rawn nachang hriat a pawimawh thu a sawi.
Dr. Chawnglungmuana, CEO, SHALOM chuan thupui sawi hawnna neiin, Mizoram danpui Article 47 leh The Narcotic Drugs and Psychotropic Substances Act, 1985-ah te hian ruihhlo do chu mi tin mawhphurhna tar lan a nih thu a sawi a. Tun laiah school naupang zingah ruihhlo ngai an awm thin tih sawiin, ruihhlo ti lo tura inzirtirna kawngah hma lak nasat a ngaih thu a sawi.
Hun kaihruaitu Dr. Jane R. Ralte, Project Director, MSACS chuan damdawi inchiu thinten natna chi hrang hrang an inkaichhawn loh nan leh an hriselna nghawng chhe chak lutuk tur ven kawngah MSACS chuan Opioid Substitution Therapy, Condom Promotion leh Syringe Needle Exchange Program-te a kalpui thin thu a sawi bawk.
Seminar-ah hian doctor, police, excise & narcotics, MSD&RB, MSACS, Food & Drugs Administration, Samaritan Society leh kohhran hrang hrang aiawh an tel a. Mi thiamten ruihhlo do leh ruihhlo ngaite enkawl dan thupui hrang hrang hmangin zirtirna an pe a ni.