Aizawl: Chief Minister Lalduhoma’n sorkar lam chan chhe sa rana company-te nena inremna ziah awm tawh lo se tih chu sorkar ngaihdan a nih thu a sawi.
Nimina Empowered Committee on Investment leh sawm bik mi pawimawh te chu chief minister Lalduhoma hovin CM office-ah an thukhawm a. He hunah Lalduhoma chuan, tun hmain sorkar lam chan chhe tur sa rana company te nena MoU ziah a lo awm tawh thin tih sawiin, “Sorkarin sum a chawi fo va, han bantir duh pawha ban hleih theih loh MoU te pawh a awm. Hetianga sorkar lam chan chhe sa rana MoU ziah hi kan sorkarah hian awm tawh lo se kan duh. Sorkarin a chhiatpui loh tur, kan duh dana MoU kan ziahpui theih chauh hi inremna siampui ila, a thei lo chu ziahpui lo mai ila, tih hi kan rilru a ni,” a ti.
Empowered Committee hian June 11, 2025 khan sawhthing leh thlai dang processing unit rawn din duh company pathumte draft MoU endiktu tur mi a ruat a. Company te draft MoU hi sorkar tan pawm vek theih a nih hmel loh avangin sorkar duh dan chiang taka tarlanna (Expression of Interest) siam a, company te hi hriattir thuai a, a tul chuan company dang pawh hriattir an rel a ni.
Thutkhawmah hian Agriculture Minister PC Vanlalruata, Commerce & Industries Minister F. Rodingliana, Adviser to chief minister pahnih TBC Lalvenchhunga leh Dr. KC Lalmalsawmzauva te an tel.