Aizawl: Aizawl Municipal Corporation (AMC)-in Aizawla chhiatrupna lo thlena chhanchhuah hna leh a tul angte thawktu tur Emergency Response Team (ERT) din dawn.
Aizawl Mayor Lalrinenga Sailo kaihhhruainain Zirtawpni khan AMC leh Zotrek Adventure Club aiawhten Mayor Office Chamber-ah Aizawla rikrum thila hma lak dan tur ruahmanna sawi hovin an thukhawm a, emergency response team din an rel a ni.
Mayor chuan chhiatna a thlena chhanchhuah leh a tul angte thawh hi AMC kuta dah ni chiah lo mah se, AMC leh corporator-te tel ve loh theih lohna thil a awm a. Aizawl enkawltu nihna angin Disaster Management Authority leh Disaster Response Force hnathawh bak bawhzui ngai awm fo thei a nih avangin AMC tan ERT neih a tul tih a sawi.
Mayor chuan state sorkar hnuaia disaster management thuneitute nen insu buai lovin mumal taka thawkho tura ruahhman a nih tur thu a sawi a. Hetiang kawnga Zotrek Adventure Club an pen chhuak chu lawmawm a tih thu a sawi.
AMC leh Zotrek Adventure Club hian thawhho rem tiin hma lak dan tur sawi ho nghal.
Thutkhawmah hian AMC atangin Lalringliana, Executive Corporator; Laltlanzova Khiangte, Executive Corporator; Rosiamngheta, Corporator; David Zohmangaiha, Corporator leh AMC official-te, Zotrek Adventure Club aiawhte an tel a ni.