India chuan Middle East-a buaina awm mek leh US-in Iran-a nuclear hmun pathum a beih mek laiin Israel-a a mi awmte chu a thiar chhuak.
Ministry of External Affairs (MEA) chuan tun kar lo awm tur chhung hian Israel-a ‘Indian haw duh’ zawng zawngte chu a la chhuak dawn tih a sawi.
“Israel atanga India an lo hawna tur hi lirthea ramri panpui an nih hnuah thlawhna hmanga India-a phurh leh tura ruahman a ni,” a ti.
“India sorkar hian ram danga Indian awmte himna leh an thatna tur hi a ngai pawimawh em em a ni,” tiin MEA chuan a sawi.
Israel-a Indian awm zawng zawngte chu Tel Aviv-a Embassy of India-ah inziak lut vek tura tih an ni a. Inziah luh harsa emaw, eng emaw thil dang hriat chian duh nei tak biak pawh theihna tur telephone number thehdarh a ni bawk.
Israel-ah hian Indian 18,000 chuang cheng mek anga ngaih a ni.
Indian sorkarin Middle East buaina chhuak mek avanga a ram mi a hruai haw hi Operation Sindhu tia vuahin Iran atang pawhin a hruai haw teuh tawh.
Iran atang bik hian zirlai 300 chuang telin Indian 800 chuang a hruai haw tawh a. Heng mite hi Iran-a Mashhad atangin thlawhna pahnih leh Turkmenistan-a Ashgabat atangin thlawhna pakhat hmanga a phurh hawte an ni.
Hruai haw tawhte bakah hian he chanchin ziah lai, Pathianni tlai khan zirlai 280 chu Mashhad atanga thlawh chhuahpu tura buaipui mek niin zanah Delhi-a tumpui hman beisei an ni a. Heng zinga 200 vel hi Jammu & Kashmir-a mite an ni nghe nghe.
Israel-Iran indona hi Israeli sipaiten ‘Operation Rising Lion’ tia June 13 atanga Iran-a nuclear leh sipai hmunte a beih atanga intan kha niin an sipai hotu lawk leh nuclear scientist lawkte a thahsak nual tawh.
Israel chuan Tehran-in nuclear ralthuam a siam mek tihtawp nan hetiang hian a che niin a insawi a. Pathianni tuk khan US-in Israel thlawpin Iran-a nuclear hmun thum a kap ve ta bawk.