Aizawl: Aizawl Treasury Square leh Tennis Court chhehvela kawngpui kama thlai thar zuarten Aizawl Municipal Corporation (AMC)-in helai kawngpui dunga inpho a khap avanga lungawi lovin Inrinni khan Tennis Court bulah kawngpui an dang.
Inrinni khan Aizawl Treasury Square, Tennis Court leh Assembly House sirah thlai thar zuara inphoin mi eng emaw zat an thu a. Hei hi AMC chuan dan phal loh a nih thu sawiin, thlai thar zuartute chu chawhma dar 10 hmain Tuikual South-a AMC Multi Complex-ah insawn lut turin a hriattir a. Mahse, thlai thar zuartute chu an insawn mai loh avangin AMC chuan an thlai thar zawrhte chu AMC Multi Complex lamah a sawn sak a. Mi eng emaw zat an sawk hman tihin thlai thar zuartute chu lungawi lovin an pungkhawm a, kawngpui an dang zui.
Kawngpui dangtu thlai thar zuartute chuan AMC chu mi rethei rapbettuah puhin AMC thiah an duhthute hmangin an au rual a ni.
Thlai thar zuartute hian Aizawl khawpui chhung hmun thenkhatah kawngpui sira thlai thar zuar an awm teuh laia, anni lakah chuan AMC thikthu a chhe bik chu an hriatthiam loh thu an sawi a. Chawlhkar khatah Inrinniah chiah an thut thu leh, an thut loh pawhin lirthei a ding zel tho tiin anni chauh an ngaihmawh chu hriatthiam har an tih thu an sawi a ni.
AMC hotute hnenah inzawrh phal turin an ngen a. Mahse, an ngenna hi AMC hotute chuan helai chhehvela thlai thar zuara inpho chu dan phal loh a nih avangin an remtihsak lo va. AMC Multi Complex-ah an tana hmun buatsaih a nih thu leh helai hmunah chauh inzawrh phal anih thu an sawi chu, thlai thar zuartute chuan an pawm theih loh avangin an inrem thei lo va, thlai thar zuartute chuan hun eng emaw chen Tennis Court bulah kawngpui hi an dang a ni.