Ram puma hman tura tih a nih chhohtirh khan kan sel luai luai a, mi tam takin kan duh lo a, kan ram ngeiah pawh pawl hrang hrangin an dodal thu an sawi. Mahse, hun a kal zel a, a huhoa pawr tak hnam hian he yoga hi kan thlirliam chho thei viau ta niin a lang.
Inrinni, June 21 kha International day of yoga a ni a, ramchhung mai bakah khawvel hmun hrang hranga India mi awmte chuan an awm hmunah an lo lawm leh nasa tawh hle.
Kan ramah pawh a lawmna pui ber chu larsap hova neih niin, RG stadium, Mualpuiah hman a ni a, tukhaw-khain kan ngaihven zui tawh lem lo niin a lang. Sawi zui peih kan awm tawh lem lo a, kan sakhua nena a inkungkaih dan lam sawi vung vakte kha a reh ta hle mai. Kan duhna chinah hi chuan kan rinnate hi kan sawhsawn ta mai mai zawk emaw ni?
Ministry of AYUSH chuan International Day of Yoga 2025 hman dan tur signature event 10 duangin, Mizoramah chuan heng zinga pahnih – Yoga Sangam leh Harit Yoga-te hi tih a ni.
International Day of Yoga pual hian Mizoram district hrang hrang, district hospital, health and wellness centre, zirna in, pawl hrang hrang leh department-ten mahni hmunhma remchangahte hun an hmang hlawm a, kan sakhaw rinna nena a hlauhawmna lam kha sawi a awm ta lo hle. Nge, kan zirchian hnuah yoga hi hrisel nan a lo tha viau ta zawk ni dawn ni? I ngaihtuah tlang tha leh deuh teh ang u.