Aizawl: Mizoram Larsap General Vijay Kumar Singh chuan hmeichhe naupang leh thing tiak phunten danglamna thlen turin enkawlna leh chhawmdawlna tha an dawn a tul thu a sawi.
Women & Child Development hnuaia State Hub for Empowerment of Women (SHEW) buatsaihin nimin khan sorkar laipui hmalakna Mission Shakti kaltlanga Beti Bachao Beti Padhao puala thing phun chu Sumtual, Aizawl Smart City Project, MINECO-a neihah Larsap General Vijay Kumar Singh hi khuallian niin, Social Welfare, Women & Child Development Minister Lalrinpuii chu khualzahawm a ni.
State Level Beti Bachao Beti Padhao Plantation Drive, 2025 puala inkhawmah Larsap Gen. VK Singh, Minister leh official-ten hmeichhe naupangte dikna leh chanvo venhim leh enkawl tha pek pawimawh zia lantir nan Ashoka thing tiak an phun.
Inkhawmah hian Larsap Gen. Singh chuan Beti Bachao Beti Padhao puala thing phun chuan hmeichhe naupangte hmasawnna tur leh environment tha nei tura hmalakna ngaihpawimawh a tulzia a entir tih a sawi a. Hmeichhe naupang leh thing tiak phun te’n danglamna thlen turin enkawlna leh chhawmdawlna tha an dawn a tul tih sawiin, thing tiak a phun chu Mizorama hmeichhe naupang zawng zawngte pual a nih thu leh hei hian chakna, finna leh zahawmna pe se tih chu a duh dan a nih thu a sawi bawk.
Larsap chuan hmeichhe naupangte chu zirna ngaipawimawh tur leh duhthusam an neihte puitlin tura theihtawp chhuah turin a fuih a. An tan khawtlang, state leh India chu nghet takin a ding zel dawn tih a sawi a. He huna thing phunte chuan hmasawnna, beiseina leh hmabak eng tak a lantir tih sawiin, thang lian zelin hrinna a pek mai bakah nghet takin a ding tih a sawi.
SW, W&CD Minister Lalrinpuii pawhin thu sawiin, thawhhona tha tak hnuaiah hmeichhe naupangte dinhmun chawikanna scheme pawimawh tak Beti Bachao Beti Padhao (BBBP) kalpui a ni chu lawmawm a tih thu a sawi a. Mizoram chuan sex ratio at birth dinhmun tha tak, national level aia tha zawk kum 2022-23-ah 935 leh kum 2023-24-ah 956 te a neih thu a sawi a. Beti Bachao Beti Padhoa chungchang inzirtirna nasa taka kalpui a nih thu a sawi bawk.