Aizawl: Information & Public Relations, Printing & Stationary Department changtu Minister Dr. Vanlalthlana’n nimin khan chanchinbumite tana buatsaih, ‘Media Workshop’ chu I&PR Auditorium-ah a hawng.
Hawnna inkhawmah Minister Dr. Vanlalthlana chuan new media an tih mai, social media platform hrang hrang thang mekah chanchinbu leh TV kaltlanga thu thar thehdarhna, traditional media chu a hlutna a la tlahniam lo mai ni lo vin, mipuiin thudik ziktluak leh rintlak an hriat theihna tangkai leh an ngaihven reng a nih avangin, a buaipuitu journalist te pawhin tan an lak thar zel a tul thu a sawi.
Dr Vanlalthlana chuan sorkar leh chanchinbute hi inzawm tlak, sorkar hmalakna hrang hrang puang darhtu an ni a. Hetih rual hian, thu thar lakkhawmna kawngah lai tak leh tan lam nei lo va, thu ziak turte zirchian hmasak a pawimawh tih a sawi a. Chanchinbumite chu an thuziak hmanga mipui rilru sukthlek hruai kawi thei an nih avangin, thu dik leh rintlak chauh puangzar thin tur leh, tawng hman dik leh ziak dan dik kawngah mawhphurhna pawimawh tak an chelh a ni tur hre reng turin a chah.
I&PR Department Director C. Lalnunkima kaihhruai inkhawmah hian IPR&PS Department Secretary Bethsy Zothanpari Sailo, MJA President C. Lalrambuatsaiha leh Mizo Language Development Board Chairman R Lallianzuala ten thu an sawi bawk.
Chawhnu lamah Lengzem Editor Vanneihtluanga thu ziak ‘Traditional Media & New Media’ leh PUC-a Mizo Dept. HOD Dr H Laldinmawia thu ziak ‘Mizo tawng ziak dan dik’ tihte chu zirho niin, heng thupui pahnihte hi sawiho.