Aizawl: Chief Minister Lalduhoma’n kum 2036 Olympic lo thleng tur thlir ranin sorkarin Vision 2036 an kalpui mek a, kawng hrang hrangin hma an la dawn tih a sawi.
Thawhtanni zing khan Mizoram Olympic Association buatsaihin Aizawlah Olympic Day Run buatsaih a ni a. Infiammite hian hmun pathum – Sikulpuikawn, Vaivakawn leh Chanmari kawn atangin Lammual an pan khawmin kharna neih a ni.
Kharna inkhawmah chief minister chuan khawvel ram tina infiammite duhaisam chu an ram aiawha Olympic-a inlan a nih thin thu a sawi a. India ram aiawha Olympic-a inlan thei Mizo thalai hi pahnih chiah an la nei tih sawiin, “Kan thalaite zingah India aiawh thei khawpa talent nei tha tam tak kan neih kan rin avangin, kum 2036 Olympic lo thleng tur khi thlir ranin kan sorkar chuan Vision 2036 kan kalpui mek a. Kawng hrang hrangin hma kan la dawn a ni,” a ti.
Mizoram Olympic Association President Robert Romawia Royte kaihhruai Olympic Day Run kharna inkhawmah hian chief minister hi Sports Minister Lalnghinglova Hmar pawhin a tawiawm.
Inkhawmah hian National Games leh NE Games hnuhnung bera medal dawngtute hnenah lawmman sem a ni bawk.
Kumina Olympic Day thupui hi ‘Move, Learn, Discover – Together for a Better World’ tih a ni.