Aizawl: Information & Public Relations (I&PR) leh Mizoram Journalists’ Association (MJA) General Headquarters buatsaih nimin khan Lunglei, Mamit leh Hnahthial-ah chanchinbumite tan ‘Media Workshop’ buatsaih a ni.
Lungleiah chuan Lunglei Press Club-ah hun hman a ni a. Lunglei District MJA President H. Lalthansanga’n inkhawm a kaihruai a, Lunglei DIPRO C lalhruaitluanga kaihhruaina hnuaiah Vanneihtluanga thuziak ‘Traditional media leh new media’ tih zirho a ni a, Dr H Laldinmawia thuzuak ‘Mizo tawng ziak dan dik’ tih chu Lunglei district MJA Treasurer K Lalrinpuia kaihhruaina hnuaiah zirho a ni.
Media Workshop ah hian I&PR-a thawkte, MJA memberte, AIR Lungleia thu thar puangtute, Zonet JB-a chanchin thar buaipuitu leh puangtute, Doordarshan Kendra (DDK) tana thu thar la khawmtu leh YouTube-a thu thar theh darhtute an tel a ni.
Mamit-ah chuan Mamit DIPRO Biaknungi kaihhruaiin DIPRO chamber-ah Media Workshop hi neih niin, Mamit MJA President Lalhuma leh Mamit Vision Director KTC Lalrinchhana te’n thu an sawi a. Vanneihtluanga thuziak ‘Traditional media leh new media’ tih leh Dr H Laldinmawia thuzuak ‘Mizo tawng ziak dan dik’ zirho a ni.
Hnahthial DIPRO pisa-a Media Workshop neih hi Hnahthial MJA President, F. Zosangliana’n a kaihruai a. Hnahthial DIPRO F.Lalrinfela chuan zir hona hi a kaihruai a ni.
I&PR leh MJA buatsaih, Media Workshop hi Thawhtanni khan IPR&PS Minister, Dr. Vanlalthlana chuan I&PR Auditorium, Aizawlah a hawng a ni.