Mizoram State Commission for Protection of Child Rights (MSCPCR) chuan Mizoram chhungah naupang chunga pawngsual leh hursualna a thleng leh thin chu ngaimawhin, pawi an tih thu an sawi a. Tun hnaia naupang khawih chhetua puh leh mi dang inhnamhawihte chu an phu tawk hremna hmu ngei tura an duh thu an sawi.
Thawhlehni khan MSCPCR Chairperson Jimmy Laltlanmawia chuan Mission Venga an pisa-ah thu thar thehdarhtute a kawm a. Naupang kumtlinglo khawih chhiaa mi dang hmuh theih tura hursualna video bawlhhlawh siam nana naupang inhnamhnawihtirtu leh pho lang tua puh, Lalrampana chu CBI-in June 9, 2025 khan an rawn man tih sawiin, “Kan ram chhunga hursualna leh a kaihhnawih naupang chunga a thleng leh thin hi commission chuan pawi a tiin, a ngaimawh takzet a ni,” a ti.
Jimmy chuan hursualna leh zahmawh rawngkai video leh thlalaka naupang inhnamhnawih tir leh tel tir emaw, hman tangkai emaw, entir leh hmuhtir emaw pawh thiang lovin, The Protection of Children from Sexual Offences (POCSO) Act, 2012 Section 13, 14 & 15 chuan a khap tlat tih a sawi a. Naupang laka hursualna leh zahmawh rawngkai lanna thlalak leh video reng reng, mi mal kawl that tur a ni emaw, mi dang hmuha pho lan tur a ni emaw pawh lo neih leh lo kawl pawh a khap a nih thu sawiin, “He dan bawhchhetu chu kum nga aia tlem lo lung in tantir leh sum chawitir thlengin a huam a, a tisual nawntu chu kum sarih thleng tang tura hrem theih a ni,” tiin fimkhur turin mipui a chah.
MSCPCR chairperson chuan Information Technology (IT) Act, 2000 Section 67 B chuan mi tupawh naupang hursualna leh a kaihhnawiha an lanna emaw, naupang inhnamhnawihna emaw, naupang zahmawh leh saruaka an lanna emaw reng reng electronic media hmanga thehdarh leh thehdarh tirtu hrem theih an nih thu a sawi a. Naupang saruaka a awmlai thlalak/video, mipat hmeichhiatna leh hursualna kaihhnawiha an lanna thlalak/video te siam chhuah emaw, lak khawm emaw, internet-a zawn emaw, download emaw, fak mawi emaw, inthawn darh leh sem kual emaw, online hmanga hursualna lam hawi leh zahmawh rawngkaia naupang thlem, vau te leh naupang, mipat hmeichhiatna an hmanglai leh an inhritla lai emaw, naupang pawngsual anih lai leh naupang chunga hursualna thleng lai lanna thlalak/video lo siamtu chu kum nga aia tlem lo lung in tan tir leh Rs 10,00,000 chawitir thlenga hrem theih a nih thu leh a tisual nawntu chu kum sarih thleng tang tura hrem leh Rs 10,00,000 chawitir theih a nih thu a sawi bawk.
MSCPCR chuan heng dan bawhchhiatna hi ram chhungah thleng tawh lo se an duh thu leh, tun hnaia naupang khawih chhetua puh, Lalrampana leh midang hetianga inhnamhawihte hian an phu tawk hremna hmu ngei tura an duh thu a sawi.