Aizawl: Pangkhua Village Council leh All NGO te chuan an hriatpuina tel lova LADC, Land Revenue & Settlement Department, Sangau-a RO LH Ramdingliana leh a thawhpuite chu zangnadawmna lak beisei avanga mi mal ram pass chhuhsakah puhin, ram pass an insiam chu tha lo tiin cancel an phut.
Pangkhua VC leh All NGO ten nimin khan thuchhuah intawm siamin, Thingsai-Bualpui-Saisih-Pangkhua-Sangau (TBSPS) road, km 7.800 leh km 29.180 (Pangkhua ram chhung bik) inkar kawng laih turah, alignment-in a paltlang chhungah khawtlang neitute hriatpuina leh rem tihna tel lova LH Ramdingliana leh a thawhpuiten zangnadawmna beisei avanga ram pass tam tham tak an insiam chu tha lo tiin, cancel an phut.
Pangkhua mipui zingah alignment-in a paltlang chhunga ram nei thenkhatte pass renew tura tih an ni a, renew tura ram neitu ten pawisa pe a office an dawr laiin chhuanlam siama renew sak duh lo vin, pawisa pawh pekkir an ni tih sawiin, “Hei hi remchang a lain, pass thi tawh anga cancel sakin mi mal ram chhungah pass thar a siam a ni tih a tawngka ngei atanga kan hriat avangin pawi kan ti a, ram neitu dik tak hnenah ram hi pek let vek ni rawh se,” a ti.
TBSPS road laih tur hi aligment avanga rei tak a thuanawp tawh lai leh, BRO-ten zangnadawmna a tam an hlauhthawn avanga kum tam tak harsatna an tawh laia Pangkhua khua leh tui nilo, revenue department-a thawk te leh an laina hnaite ram pek an ni hi pawi an tih thu sawiin, ram hmasawnna tihthuanawp tumna leh ram leh hnam rawkna an ngaih thu an sawi a. Zangnadawmna beisei avanga kum 2023-2025 chhunga Revenue Department-in ram pass an siam thar zawng zawng te hi cancel an phut thu an sawi bawk.