Aizawl: PWD chuan Aizawl khawpui chhung kawngpui pengthuam thenkhat siam dan tur Chief Minister Lalduhoma an sawipui.
Thawhlehni khan PWD hotute chuan chief minister chu a pisaa an kawm a. PWD Minister Vanlalhlana chuan hmun pathum Bawngkawn pengthuamah hmun hnih leh Vaivakawn pengthuam te siam dan tur an rawtna te a sawi fiah a. Aizawl pengthuam pawimawhte siam tumna a lo awm tawh thin mah se, siam man a sangin a lian tham deuh thin. Tuna an ruahman hi chu sum seng tam lutuk lova pengthuam pawimawh pathum siam that tumna a nih thu a sawi.
PWD ruahman dan chuan State Guest House thlanga Chaltlang Road hnuaiah Ramhlun main road leh Ramhlun lower road te lei verh siam a, lei hnuaia inzawm tir a, Bawngkawn Police Station bulah National Highway zawmtir a. Ramhlun lam atanga NH lama kal duhte tan leh NH atanga Ramhlun main road leh lower road-a kal turte tan traffic point va thleng kher lova kaltir tum a ni a, lirthei lian te erawh chu an kal thei dawn lo va, he project hi Rs. vbc 25-a thawh theih tura beisei a ni.
Bawngkawn Hrangbana Filling Station thlang, tripper dinna atanga leihlawn, Brigade veng lama va dawhkai a. Serchhip Bypass road, Sailiamkawn bula an dawh leihlawn ang chiah he hmunah hian metre 49 vela sang, metre 150 a sei a dawh theih niin ngaih a ni a. Lei dawh hi Brigade veng lamah chuan Greenwood Hospital bul pengthuam velah a chhuak ang a. He hna hi Rs vbc 30 vela thawh theih tura ngaih a ni.
Vaivakawn pengthuam ruahmanna hi tuna Vaivakawn bazar sak mai tawh tur nen kal kawptir a ngai dawn a. Cultural Centre bul hnai atanga YMA ground sir deuh chunga leihlawn, Bazar atana hman theih nghal tur a ni dawn a, Rs vbc 40 vela sak theih beisei a ni bawk.
PWD hotute sawi danin, Bawngkawn pengthuam hi Aizawl khawpui chhunga pengthuam lun ber a ni a. Chawhrualin ni tin lirthei 50,000 chuangin an paltlang thin a. Vaivakawn pengthuam hi chawhrualin ni tin lirthei 30,000 chuangin an paltlang thin a. Hetiang a nih avangin traffic jam a nasa thin a. Hemi tiziaawm tura ruahmanna duan ni mah se, eng sum atangin nge thawh a nih ang tih la dap leh tur niin, a thawhna tur sum hnar sawi a ni rih lo va, a thuphunga sawi a ni.