India-a football league sang ber, Indian Super League (ISL) dinhmun a chiang rih lo hle niin thawm a awm mek a. Tun hnaia All India Football Federation (AIFF)-in calendar an tihchhuahah an dah tel lo.
ISL buatsaihtute chuan he huanga club awmte hnenah 2025-26 season lo awm tur chungchangah thu chiang a awm thei rih lo niin an hriattir a, AIFF nen inremna thuthlung an ziah, Master Rights Agreement (MRA) dinhmun an tihchian phawt loh chuan season thar bul an tan loh tur thu pawh an puang.
ISL hi Football Sports Development Limited (FSDL)-te enkawl a ni a, anni hi AIFF nen sumdawnna lama inzawm nghet tlat niin kum 2010 khan kum 15 chhung atan MRA an ziak.
MRA-a an inrem danah chuan FSDL hian AIFF hnenah kum tin Rs. vaibelchhe 50 an pe ziah ang a, heti hian TV lama inkhel tihchhuah chungchangah thuneihna an chang thung ang a. Chu bakah India-a football kalphungah thuneihna sang tak an nei ang a, India national team thlengin an thuneihna hian a huam tel thei dawn.
Tun hnaia AIFF calendar an tlangzarhah ISL hi telh a ni lo a, hei hian titi a titam hle a. Hetiang a nih takah chuan FSDL hian ISL club neitute hnenah MRA chungchang sawi fiah thar leh a nih loh chuan 2025-26 season bul an tan loh tur thu an hriattir a. December thlaah MRA hi a tawp tawh dawn a, inremna thar an ziak dawn nge tuna an thuthlung hi an tinung thar leh dawn tih pawh engmah sawi rik a awm thei rih lo a. Hei hi FSDL chuan ISL season tan hma ngeia tihchian phawt an duh a ni.
AIFF chuan FSDL-in an dawr thar miah lo niin an sawi ve thung a. AIFF Deputy Secretary General M Satyanarayan chuan, “ISL chungchangah FSDL hian min rawn dawr thar lo a, min rawn be lo hrim hrim,” a ti.
ISL season hnuhnung pahnihte kha September thla atanga tan ve ve an ni a. FSDL chuan ISL enkawl dan siksawi danglam hret an tum niin sawi a awm a, ISL-a tel club-te chuan 60% chanvo an nei ang a, FSDL-in 26% neiin, AIFF chuan 14% nei turin ruahmanna an siam a. Heti hian ruahman chhin mah se thutlukna chiang tak erawh a la awm lo thung.
Calendar thar an tihchhuaha ISL tel lo chungchangah AIFF chuan, “Kan calendar tihchhuah atang khan thutlukna siam ngawt chi a ni lo a. Kha kha thla hmasa lama kan tihchhuah daih tawh a ni a, chu bakah kha calendar-a kan dah telho kha chu AIFF-in keimahni puala kan buaipui ho chauh an ni,” a ti.
A sawi zelnaah, “ISL hi AIFF enkawl bik a ni lo a, kha vang khan ISL khelh hun tur vel pawh engmah kan dah tel loh phah a. A hrim hrimin a hma pawhin AIFF chuan ISL khelh hun tur chungchangah FSDL kan rawn hmasa ziah thin a, chu chu kan tih dan nghet a ni a. AIFF enkawl bik a nih loh vanga calendar-a tel lo a ni,” a ti bawk.
AIFF calendar an tihchhuahah hian Durand Cup chu a hmasa ber a, July, 2025-a khelh tura ruahman niin September thlaah Super Cup khelh tura ruahman a ni a. Super Cup hi ISL season tawpa khelh thin a ni a, thil a chian rih loh em avang sawn hma ta an ni.