Kan ram thenawm Myanmar ram buaina avangin sahimna zawngin mi tam tak an rawn raltlan a, Mizoram hmun hrang hrangah an awm darh hlawm.
Heng sahimna zawnga rawn raltlante hi eizawnna nghet nei lem lo, a rem rem thawka awm an ni tlangpui a, fel tak tak an awm bawk.
Hetih lai hian awm tha duh lo, dan phal loh thil tih ching leh khawtlanga buaina siam ching an awm leh thin hi a pawi a, hmun thenkhatah phei chuan an inhnawtchhuak rap rap tan ta hial mai.
Raltlante hi duat theih tawpin kan duat a, a theih ang anga khawtlang/khawtual mi anga en in, nuam lo an tih ang tih mawlh hlauin kan lo enkawl a. Fel tak tak an awm laia a thang mawi lo zawnga khawsa an awm leh thin hi a pawi a, hetiang hi chu kan dim loh tlan pawh a pawi lo mai thei e.
Kan ram hi a ralmuang a, a mi chengte pawh kan innelin, kan theihna zawnah kan induhsak thin hle. Mahse, raltlan thenkhat, awm tha duh lote avanga kan dinhmun a ralmuang lo leh dan phal loh a damdawi tawlhruk hluar chho ta viau hi a pawi a, heng mite hi chu dim lova hremna na zawk kan pek ngam zel pawh hi a tul hle. A fel tak takte hmai tibaltu an ni zel si a.